Кенияда самолёт сайёҳлар билан ҳалокатга учради (видео)

Бугун, 28 октябрь куни Кенияда парвоздан бир неча дақиқа ўтиб, бортида хорижлик сайёҳлар бўлган кичик самолёт ҳалокатга учради. Ҳодиса оқибатида 11 киши ҳалок бўлган. Бу ҳақда “Euronews” хабар берди.

Қайд этилишича, маҳаллий вақт билан соат 5:30 да Mombasa Air Safari авиакомпаниясига тегишли енгил двигателли самолёт Масаи-Мара миллий қўриқхонаси томон кетаётган пайтда, Кения жануби-шарқидаги Диани учиш-қўниш йўлагидан 40 км нарида, тепалик ва ўрмонли ҳудудда қулаб тушган.

Авиакомпанияга кўра, учувчи Дианидан ҳавога кўтарилганидан кейин алоқага чиқмаган. Аэропорт диспетчерлик хизмати эса у билан 30 дақиқа давомида боғланишга уринган, шундан сўнг самолёт ҳалокатга учрагани аниқланган.

Компания маълумотига кўра, ҳалокат оқибатида 11 киши – 8 нафар венгрия фуқароси, 2 нафар германиялик ва 1 нафар кениялик учувчи ҳалок бўлган. Тергов органлари самолёт ҳалокатининг сабабларини ўрганаётганини билдирган.

Маълум бўлишича, фожиа юз берган пайтда Кения соҳилида кучли ёмғир ёғаётган бўлган. Расмийларнинг сўзларига кўра, самолёт ёниб кетган. Гувоҳлар эса баланд портлаш товушини эшитганини ва воқеа жойидан инсонга тегишли таниб бўлмас жасад қолдиқлари топилганини айтган.

Эслатиб ўтамиз, аввалроқ АҚШ Ҳарбий-денгиз кучларининг F-18 қирувчи самолёти ва MH-60Р Sea Hawk вертолёти Жанубий Хитой денгизида ҳалокатга учраганди. Ҳодисадан сўнг ҳар икки экипаж аъзолари қутқарилган.