“Келажакка қайтиб” фильми актёри вафот этди

“Келажакка қайтиб” ва “Моҳир мерган” фильмлари актёри Жеймс Толкен бугун, 28 март тонгида Нью-Йорк шаҳрининг Саранак кўли яқинидаги уйида 94 ёшида вафот этди. Бу ҳақда “Келажакка қайтиб” фильмининг расмий саҳифасида хабар берилди. 

Актёр мухлисларга “Келажакка қайтиб” фильмидаги қаттиққўл ўқитувчи жаноб Стрикленд роли орқали танилган эди.

“Моҳир қўллар” фильмининг бош продюссери Боб Гейл дўстининг ўлимидан чуқур қайғуда эканлигини айтиб, ўзининг Х ижтимоий тармоғидаги саҳифасида пост қолдирган.

“У ҳар бир ролини эсда қоларли ижро этадиган жуда ажойиб актёр ва содиқ дўст эди. Мен унинг карьерасидаги сўнгги фильм – “Моҳир қўллар”да у билан бирга ишлаганимдан хурсандман. “Жаноб Стрикленд” бизнинг қалбимизда абадий яшайди”, дейди Боб Гейл.

Унинг нима сабабдан вафот этганлиги ҳали очиқланмаган.

Маълумот учун, Жеймс Толкен 1931 йилнинг 20 июнь куни АҚШнинг Мичиган штатида, чорва моллари сотувчиси Дейл Николас оиласида дунёга келган. У 1949 йилда Тусон шаҳридаги актёрликка ихтисослаштирилган Тусон амфитеатр мактабини битириб, Ғарбий Аризона коллежига қабул қилинган ва коллеж крикет жамоасига сардорлик қилган. Жеймс ўзининг актёрлик фаолиятини 1950 йилларнинг охирида кичик эпизодлардан бошлаб, илк ролини Марк Ҳеллингернинг “Яланғоч шаҳар” фильмида ижро этган.

Актёр Голливуддаги фаолиятини бошлашдан олдин Корея урушида АҚШ денгиз флоти аъзоси сифатида хизмат ўтаган. Жеймс урушда олган оғир жароҳатидан сўнг шифохонага ётқизилиб, чиққанидан сўнг ўзининг кейинги 50 йиллик карьерасини Голливудда давом эттирган. Шунингдек, у Айова университетининг драма факультетида таҳсил олиб, бакалавр даражасини қўлга киритган.

Жеймс ўзининг актёрлик фаолияти давомида “Келажакка қайтиб 1”, “Коинот қўриқчилари”, “Моҳир қўллар”, “Кобра”, “Уруш ўйинлари”, “Асл қон” фильмларида катта-кичик қаҳрамонларни дебют қилган.

У ҳамкасби Тускона Велс билан Тусон амфитеатрида танишиб, 1971 йилда у билан оила қурган ва умрининг охиригача бирга яшаган. Актёрнинг фарзанди бўлмаган. Аёлининг айтишича, Жеймс барча меҳрини ҳайвонларга улашган.

Жеймс Толкен ўзининг сўнгги ролини 2015 йилда суратга олинган “Жанговар Томагавк” фильмида ижро этган. Шундан сўнг Жеймс муҳлисларига актёрлик фаолиятини бутунлай якунлаганини эълон қилган.

Эслатиб ўтамиз, “Оскар” мукофоти соҳиби, “Чўқинтирган ота” фильми юлдузи Роберт Дюваль жорий йилнинг 15 февраль куни 96 ёшида вафот этганди.