“Кариб денгизи қароқчилари”. АҚШ яна бир кемани қўлга олди (видео)

АҚШ ҳарбийлари Кариб денгизида Венесуэлага қарши жорий этилган блокадани бузган навбатдаги – еттинчи нефть танкерини қўлга олди. Бу ҳақда кеча, 20 январь куни АҚШ Қуролли кучларининг Жанубий қўмондонлиги хабар берди.

Хабарга кўра, Sagitta номли танкер АҚШ Президенти Дональд Трамп томонидан жорий этилган чекловларни бузган. Кема АҚШ ҳарбийлари томонидан Ички хавфсизлик вазирлиги билан ҳамкорликда назоратга олинган. Жанубий қўмондонликнинг таъкидлашича, операция давомида ҳеч қандай ҳодиса юз бермаган, яъни ўлим ва жароҳатлар қайд этилмаган. 

АҚШ расмийлари Венесуэладан чиқаётган нефть фақат қонуний ва белгиланган тартибда етказиб берилишини таъминлашга қатъий қарор қилганини билдирган.

“VesselFinder” маълумотларига кўра, Sagitta танкери Панама байроғи остида сузади ва АҚШ, Европа Иттифоқи ҳамда Буюк Британиянинг санкция рўйхатларига киритилган. Шу билан бирга, “MarineTraffic” портали худди шу ном ва рақамга эга танкер Либерия байроғи остида юришини кўрсатмоқда.

Бу Венесуэла нефтини экспорт қилишда иштирок этаётган танкерларни таъқиб қилиш доирасида АҚШ ҳарбийлари томонидан қўлга олинган еттинчи кема ҳисобланади.

АҚШнинг асосан Кариб денгизида ўтказаётган ушбу операциялари жамоатчиликнинг кескин эътирозларига сабаб бўлган. Баъзилар Американинг ҳаракатларини “ақлдан озиш” дея баҳолаган бўлса, яна баъзилар Трамп маъмуриятини “Кариб денгизининг қароқчилари”га тенглаштирган. 

7 январь куни, дастлабки ҳолатлардан бири сифатида, Россия компаниясига тегишли Marinera (Bella 1) танкери ушланган эди. Ушбу кема икки ҳафтадан ортиқ вақт давомида АҚШ қирғоқ қўриқлаш хизмати кемасидан қочиб юрган. Россия томони бу ҳодисани ноқонуний куч ишлатиш, деб баҳолаган. Москва маълумотига кўра, Вашингтон экипаж таркибидаги икки нафар Россия фуқаросини озод қилишга ваъда берган, бироқ 20 январь куни Россия Ташқи ишлар вазири Сергей Лавров бу ваъда бажарилмаганини айтди.

Эслатиб ўтамиз, аввалроқ Венесуэладан қочаётган “соя флоти”га мансуб танкерлар АҚШ ҳарбий кемаларидан яшириниш учун байроқларини Россияники билан алмаштираётгани ҳақида хабар берилганди.