Камилла Раҳимова дунёнинг тўртинчи ракеткасига қарши кортга чиқди

Бугун, 7 март куни Ўзбекистоннинг 1 ракеткаси Камилла Раҳимова АҚШнинг Индиан-Уэллс шаҳридаги WTA 1000 тоифасига кирувчи турнирда дунёнинг 4 ракеткаси Коко Гауффга қарши кортга чиқди ва имкониятни бой берди. 

Дунёнинг 4-рақамли теннисчиси мусобақанинг иккинчи босқичида WTA рейтингида 88-ўринни эгаллаб турган ўзбекистонлик Камилла Ракҳимовани мағлуб этди. Учрашув Гауффнинг кетма-кет сетларда 6/3, 7/6 ҳисобидаги ғалабаси билан якунланди.

1 соат 59 дақиқа давом этган курашнинг иккинчи сети тай-бреккача етиб борди ва унда америкалик теннисчи устун келиб, учрашув тақдирини ҳал қилди.

Коко Гауфф ўйин давомида бирорта ҳам эйс амалга ошира олмади, бироқ 20 та брейк-поинт имкониятидан 7 тасидан фойдаланди. Шунингдек, у 10 та қўшхатога йўл қўйди. Камилла Ракҳимова эса 1 та эйс амалга оширди, 3 та қўшхатога йўл қўйди ҳамда 13 та брейк-поинт имкониятидан 5 тасини унумли фойдаланди.

Учинчи босқичда Гауфф Даяна Ястремская ва Александра Эала ўртасидаги жуфтлик ғолибига қарши кортга чиқади.