“Кальмар ўйини”даги 79 ёшли актёр жинсий зўравонлик қилишда айбдор деб топилди

Жанубий Корея суди “Кальмар ўйини” сериалидаги 79 ёшли актёр О Ён Суга етти йил олдин содир қилган жинсий зўравонликда шартли ҳукм чиқарди. Бу ҳақда “Yonhap” агентлиги хабар берди.

Актёр жазони икки йилга кечиктириш шарти билан саккиз ойлик қамоқ жазосига ҳукм қилинди. Шунингдек, суд унга 40 соатлик жинсий жиноятчилар дастурини бажаришни буюрди.

О Ён Су суд залидан чиқиб, суд қарори устидан шикоят қилиш ниятини билдирди.

Тергов маълумотларига кўра, 2017 йилда О Ён Су аёлни ўз хоҳишига қарши қучоқлаб, юзидан ўпган. Тазйиқ қурбони полицияга 2021 йил декабрь ойида мурожаат қилган ва О Ён Суга нисбатан айблов 2022 йил ноябрда эълон қилинган. 2024 йил февралида прокуратура суддан уни бир йилга озодликдан маҳрум қилишни ҳамда болалар ва ўсмирлар муассасаларида ишлашини тақиқлашни сўраган.

О Ён Су “Кальмар ўйини” сериалида 001-рақамли иштирокчи О Иль Нам ролини ўйнаган. 2022 йилда у ушбу сериалдаги роли учун “Энг яхши иккинчи пландаги актёр” сифатида “Олтин глобус” билан тақдирланган.

“Кальмар ўйини” сериали Netflix стриминг платформасида 2021 йил сентябрь ойи ўрталарида чиқди. Тўққиз қисмдан иборат сериал молиявий муаммолар туфайли омон қолиш ўйинида иштирок этишга қарор қилган бир гуруҳ одамлар ҳақида ҳикоя қилади. Чиқарилганидан кейин бир ойдан камроқ вақт ичида сериални 111 миллион киши томоша қилган. Бу Netflix’нинг 2021 йилда энг кўп кўрилган лойиҳаси бўлди — дунёнинг 90 мамлакатида “Кальмар ўйини” Netflix’нинг энг кўп кўрилган сериаллари рўйхатида биринчи ўринни эгаллади.