Қўйлиқда “қайчили ўғри” қўлга тушди (видео)

Пойтахт Тошкентнинг Бектемир туманида қаровсиз қолдирилган автомобиллардан жами 90 миллион сўмдан ортиқ пул ўғирлаган шахс қўлга олинди. Бу ҳақда Тошкент шаҳар Ички ишлар бош бошқармаси хабар берди.

Маълум қилинишича, гумонланувчи Қўйлиқ деҳқон бозори ҳудудида турган Nexia-2 автомобилини қайчи ёрдамида очиб, аввал салонни, сўнг юкхонани кўздан кечирган ва у ердан 76 миллион сўмдан ортиқ пул маблағларини қўлга киритиб, воқеа жойидан яширинган.

“Атрофни кузатиб турганимда машинадан пул тушириб олиб кетаётган эркакни кўрдим. У кетгач, ҳеч ким йўқлигидан фойдаланиб, машинада сигнализация ҳам йўқлигини билиб олдим. Шунда имкониятдан фойдаланиб, қора пакетдаги пулларни олдим”, дейди гумонланувчи. 

Орадан кўп вақт ўтмай, у яна ўша ҳудудга қайтади. Бу сафар эшиклари очиқ қолдирилган Cobalt автомобилини осонликча очиб, унинг салонида бўлган 17 миллион сўм пулни ўғирлаб, яна ғойиб бўлади.

“Телефонда гаплашиб кетаётган эгаси машинани қулфламасдан кетиб қолди. Шундан фойдаланиб, салондаги пулларни олдим. Қилган ишимдан пушаймонман”, дейди у. 

Шу воқеалардан кейин ҳам у Бектемир туманига яна жиноят содир этиш мақсадида келганида, тезкор тадбир давомида қўлга олинган.

Мазкур ҳолат бўйича Жиноят кодексининг 169-моддаси (Ўғрилик) билан жиноят иши қўзғатилган ва гумон қилинувчига нисбатан қамоққа олиш эҳтиёт чораси қўлланилган. Ҳозирда тергов ҳаракатлари давом этмоқда.

Эслатиб ўтамиз, аввалроқ маст ҳолда автомобиль олиб қочган судья 7 йилга қамалгани ҳақида хабар қилинганди.

Комила Қобилова