Qo‘qonda noqonuniy dori ishiga aralashgan advokat qo‘lga tushdi

Farg‘ona viloyatida Qirg‘iziston Respublikasidan olib kelingan 14700 dona kuchli ta’sir qiluvchi dori vositalari musodara qilindi. Bu haqda Davlat xavfsizlik ximati xabar berdi.

Ma’lum qilinishicha, o‘tkazilgan tezkor tadbirda Qo‘qon shahrida yashovchi, 1983 va 1993 yillarda tug‘ilgan, muqaddam sudlangan 2 nafar fuqaro shaxsiy boylik orttirish maqsadida o‘zaro til biriktirib, o‘zbek-qirg‘iz davlat chegarasining Quvasoy shahri hududidan o‘tuvchi qismida avvaldan kelishilgan holda Qirg‘iziston fuqarosidan 8000 dona “Zardeks” kuchli ta’sir qiluvchi dori vositalarini qabul qilib oladi.

So‘ngra, ushbu dori vositalarini kelgusida sotish maqsadida Qo‘qon shahrida ijaraga olingan xonadonga olib borgan hamda xodimlar tomonidan ushlangan.

Qo‘qon shahrida kuzatilgan yana bir holatda mahalliy advokatlik byurosi advokati hamda 1974 va 1984 yillarda tug‘ilgan 2 nafar fuqaro o‘zaro til biriktirib, vitamin dori vositalari ko‘rinishida qadoqlangan jami 4400 dona “Regapen” kuchli ta’sir qiluvchi dori vositalarini 180 mln so‘mga sotgan vaqtlarida ashyoviy dalillar bilan ushlangan.

Qayd etish joiz, mazkur 3 nafar qonunbuzarning barchasi muqaddam sudlangan shaxslar hisoblanadi.

Boshqa holatda esa Farg‘ona-Qo‘qon yo‘nalishida harakatlanayotgan, 1983 yilda tug‘ilgan muqaddam Jinoyat Kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan sudlangan shaxs boshqaruvidagi avtomashina Uchko‘prik tumani hududida to‘xtatilgan.

Xolislar ishtirokida ko‘zdan kechirilganda avtotransport vositasining salon qismida 100 dona “Tropikamid” va 559 dona “Regapen” nomli jami 110 mln so‘mlik kuchli ta’sir qiluvchi dori vositalari borligi aniqlanib, tegishli tartibda olingan.

Tezkor tadbir davom ettirilib, ushbu shaxsga dorilarni sotgan - Farg‘ona tumanida yashovchi, 1981 yilda tug‘ilgan fuqaro Qo‘shtepa tumanida boshqa xaridorga 1400 dona “Regapen” kuchli ta’sir ta’sir qiluvchi dori vositalarini 2800 AQSH dollariga sotgan vaqtida qo‘lga olingan.

Xuddi shu yo‘nalishda harakatlanayotgan yana bir avtomashina ham Uchko‘prik tumani hududida to‘xtatilib, ko‘zdan kechirilganda, uning salonida Qo‘qon shahrida yashovchi, mukaddam giyohvandlik vositalari bilan bog‘liq jinoyati uchun sudlangan, 1981 yilda tug‘ilgan shaxsga tegishli umumiy qiymati 75 mln so‘mlik 250 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirib olingan.

Bildirilishicha, hozirda ushbu shaxslarga nisbatan jinoyat ishlari qo‘zg‘atilib, qamoq ehtiyot chorasi qo‘llanilgan. Tergov harakatlari olib borilmoqda.

Eslatib o‘tamiz, avvalroq Buxoro viloyatining Buxoro tumanida sifati kafolatlanmagan dori vositalari savdosiga barham berilgandi.