Қозоғистонда қатор Россия телеканалларининг эфири тўхтатилди

Қозоғистондаги пуллик сунъий йўлдош ва интернет телевидениеси оператори TVCOM Россиянинг бир қатор телеканаллари, жумладан, “Первый канал”ни ҳам эфир жадвалидан чиқариб ташлади. Бу ҳақда алоқа оператори матбуот хизмати хабарида айтилади.

Қайд этилишича, “Первый канал СНГ”, “Время: далекое и близкое”, “Телекафе”, “Музыка Первого”, “Карусель”, “О!”, “Поехали”, “Дом кино”, “Дом кино Премиум”, “Победа” ва “Бобер” тўхтатилган каналлар сирасига киради. 

Компания бу қарорни "ахборот кун тартибига эга каналлар сонини камайтириш" доирасида қабул қилганини тушунтирди. Айтилишича, раҳбарият буйруғи билан янгиликлар контентига эга хорижий телерадиокомпаниялар улуши босқичма-босқич қисқартирилади – уларнинг ўрнини кўнгилочар, кино ва маърифий характердаги юқори рейтингли телеканаллар, жумладан “Discovery”, “Animal Planet” ва “Eurosport” каналлари эгаллайди.

TVCOM оператор абонентлари “медиа саводхонлигининг юқори даражасига эришганини ва янгиликни асосан ижтимоий тармоқлардан олганини” таъкидлаган ва “Первый канал”нинг контенти эксклюзив бўлмагани ва уни Интернет орқали бепул томоша қилиш мумкинлигини билдирган. 

“Болалар ва кўнгилочар каналларга келсак, улар пичоқ остидан ўтишга мажбур бўлди, чунки "уларнинг диапазони мажбурий, муқобил бўлмаган хусусиятга эга", дея қўшимча қилди компания.

“Первый канал. Всемирная сеть”нинг Қозоғистондаги вакили Ирина Калашникованинг таъкидлашича, TVCOM томонидан айтилган сабаблар ҳақиқатга тўғри келмайди ва пакетнинг узилиши операторнинг қарзи билан боғлиқ.

“Биз 2024 йил учун консенсусга эриша олмадик, шунинг учун шартнома тузилмади. Асосий сабаб - операторнинг муаллифлик ҳуқуқи эгасидан қарзи”, дейди у.

Калашникованинг сўзларига кўра, компания муносабатларни сақлаб қолиш учун "охиригача" ҳаракат қилган, шартномада назарда тутилганига қарамай, ҳеч қандай жарима қўлламаган. 

“Аммо оператор тўламади. Шу сабабли биз ёпилишга мажбур бўлдик. Операторга узилиш ҳақида хабар берилди. Биз бу ҳақда бир йилдан бери огоҳлантириб келяпмиз”, дея таъкидлайди у.

У оператор тез орада юзага келган қарзни тўлиқ тўлаши ва ҳамкорликни тиклашига умид билдирди.

"Хизматлар учун виждонан пул тўлаган томошабинларимиз севимли каналларини йўқотиб қўйганидан хафамиз, албатта. Аммо, ҳозирги вазиятда кўрилган чорани мажбурий деб биламиз", дейди Ирина Калашникова.

Маълумот учун, ўтган йилнинг август ойида Қозоғистон Ахборот ва ижтимоий ривожланиш вазирлиги қарори билан “Царьград” телеканалининг сайти "экстремизм тарғиботи" учун блокланган. Ноябрь ойида эса Қозоғистон расмийлари қарори билан “Спутник24” портали мамлакатда блокланди. У “Первый канал”, “Россия 1”, “Россия 24”, НТВ ва “Russia today” телеканалларини томоша қилиш имконини берарди. Бунга республика ҳудудида лицензияга эга бўлмаган телерадиоэшиттириш операторлари ва ускуналари хизматларига шартли кириш карталари тўғрисидаги маълумотларнинг тарқатилиши сабаб бўлган.