Қозоғистонда бекор қилинган парвоз учун компенсация олиш осонлашади
Олам
−
19 Февраль 2467 2 дақиқа
Қозоғистонда парвозлар кечикадиган ҳолатлар учун рақамли суғурта пайдо бўлади. Шунингдек, мамлакат авиация ёқилғиси нархини пасайтиришни режалаштирмоқда. Бу ҳақда Транспорт вазири ўринбосари Талгат Ластаев маълум қилди.
Унинг сўзларига кўра, мамлакатда йўловчилар учун биометрик идентификациялашни жорий этиш ва парвозлар кечикиши учун компенсация олиш жараёнини соддалаштириш режалаштирилмоқда. Мамлакатдаги аэропортларда E-freight юк ташишда электрон ҳужжат айланиш тизими ва API/PNR ҳаво йўловчилари тўғрисидаги маълумотларни тўплаш лойиҳалари аллақачон амалга оширилган. Шунингдек, аэропортларда E-doc -аэропорт тизими ишлайди. Бу эса йўловчиларга қоғоз ҳужжатларни кўрсатмасдан рўйхатдан ва назоратдан ўтиш имконини беради.
Вазир ўринбосарининг айтишича, йўловчиларни биометрик идентификация қилиш, парвоз вақти ва ёқилғи сарфини қисқартириш учун йўналишни оптималлаштириш, парвозлар кечикканда рақамли суғурта хизмати кўрсатилмоқда. Бу авиачипталарни сотиш иловасида жорий қилинган махсус хизмат бўлиб, йўловчиларга кечикишларни суғурталаш ва парвоз кечиктирилган тақдирда тўловларни бир зумда қайтариб олиш имконини беради.
Ластаев транспортни ривожлантириш учун авиация ёқилғиси етарли миқдорда ва рақобатбардош нархда зарурлигига эътибор қаратди. Шу муносабат билан Рақобатни ҳимоя қилиш ва ривожлантириш агентлиги ҳамда Энергетика вазирлиги ҳамкорлигида авиация ёқилғиси таннархини пасайтириш, ишлаб чиқаришни кўпайтириш ва JETA-1 стандартларига ўтиш, етказиб беришда воситачиларни бартараф этишга қаратилган комплекс чора-тадбирлар ишлаб чиқилмоқда.
Эслатиб ўтамиз, аввалроқ Қозоғистонда “хорижий агентлар” ҳақидаги қонун қабул қилиниши мумкинлиги ҳақида хабар берилганди.
