Qozog‘iston YeIning mumkin bo‘lgan sanksiyalari yuzasidan javob qaytardi

Avvalroq “Bloomberg” nashri o‘z manbalariga tayanib, Yevropa Ittifoqi Qozog‘istonga qarshi birinchi marta ikkilamchi sanksiyalarni qo‘llash imkoniyatini ko‘rib chiqayotgani haqida xabar bergandi. Rasmiy Ostona agentlikka Yevropa Ittifoqining mumkin bo‘lgan sanksiyalari yuzasidan javob berdi. Bu haqda “Tengrinews” yozdi.

Qozog‘iston Savdo va integratsiya vazirligi Yevropa Ittifoqi Qozog‘istonga qarshi sanksiyalarni chetlab o‘tishga qarshi kurash vositasidan foydalanishi mumkinligi haqidagi nashrlar fonida bayonot berdi.

“Biz Yevroittifoqdagi hamkorlarimiz bilan doimiy muloqotdamiz. Shunday qilib, avvalroq, muzokaralar yakunlariga ko‘ra, Qozog‘iston ko‘mirining Rossiya portlari orqali tranziti bilan bog‘liq muammoni hal qilishga va uni cheklovlardan chiqarib tashlashga muvaffaq bo‘ldik. Boshqa sohalarda ham xuddi shunday yo‘nalishda ish olib boriladi – tashqi iqtisodiy faoliyatning shaffofligini ta’minlash, milliy manfaatlarni himoya qilish va savdo barqarorligini ta’minlashga e’tibor qaratiladi”, deyiladi vazirlik bayonotida.

Ta’kidlanishicha, Qozog‘iston o‘z xalqaro majburiyatlarini izchil va tizimli ravishda bajarib, “cheklovchi choralarni chetlab o‘tish uchun o‘z hududidan foydalanishning oldini olish choralarini ko‘radi”.

Nima bo‘lgan edi?

“Bloomberg” Yevropa Ittifoqining Rossiyaga qarshi navbatdagi, 19-sanksiya paketi haqida maqola chop etdi. OAV xabarlariga ko‘ra, u taxminan 6 ta bank va energetika kompaniyalarini, shuningdek, to‘lov tizimlari, kripto birjalari va qo‘shimcha neft sotish sxemalariga qarshi choralarni o‘z ichiga olishi mumkin. Nashrning qayd etishicha, agar sanksiyalar qo‘llansa, Ostonaga Yevropa rasmiylariga ko‘ra, haligacha katta miqdorda qurol ishlab chiqarishda foydalaniladigan Rossiyaga yo‘naltirilayotgan ayrim uskunalarni olib kirish taqiqlanadi.

Agentlik manbalarining ta’kidlashicha, qaror hali qabul qilinmagan, buning uchun Yevropa Ittifoqiga a’zo barcha davlatlarning dalillari va yordami zarur.

Taklif etilayotgan choralar Yevropa Ittifoqining hozirda muhokama qilinayotgan Rossiyaga qarshi sanksiyalarning 19-paketi tarkibiga kirishi mumkin. Yangi paket Rossiya banklari va neft kompaniyalariga nisbatan kuchaytirilgan cheklovlar, “soya”dagi flotdan tankerlarni qayta sug‘urtalashni taqiqlash, uchinchi davlat neft treyderlariga qarshi sanksiyalar va Rossiya harbiy sanoatida qo‘llanilishi mumkin bo‘lgan tovarlarni eksport qilishning yangi taqiqlarini ham o‘z ichiga oladi.

Bir qator Qozog‘iston kompaniyalari avvallari Yevropa Ittifoqi va AQSHning sanksiya ro‘yxatidan o‘rin olgan bo‘lsa, endilikda birinchi marta butun bir davlatga qarshi ikkinchi darajali sanksiyalar muhokama qilinmoqda.