Қозоғистон тинчликпарвар кучларини Яқин Шарқ ва Африкага юборади

Қозоғистон Яқин Шарқ ва Африка мамлакатларига тинчликпарвар кучларини юборади. Бу ҳақда “Tengrinews” нашри хабар берди. 

Бундай таклиф депутатлар муҳокамасига Президент Қосим-Жомарт Тўқаев томонидан киритилган. Парламент аъзолари бир овоздан тинчликпарвар кучларни юборишга овоз беришга рози бўлган.

Қозоғистон БМТ миссияларида иштирок этиш учун 430 нафаргача аскарларини жўнатади. Жумладан, улар:

• "Бирлашган Миллатлар Ташкилотининг Голан тепаликларида бўлиниш бўйича кузатувчи кучлари" (Сурия – Исроил);
• “БМТ сулҳ назорати ташкилоти” (Фаластин – Исроил);
• "Жанубий Судан Республикасидаги БМТ миссияси" (Жанубий Судан);
• "Бирлашган Миллатлар Ташкилотининг Абеи учун вақтинчалик хавфсизлик кучлари" (Судан) таркибига кириши мумкин.

“Қозоғистон Қуролли кучлари алоҳида ҳарбий хизматчиларни ҳам ҳарбий кузатувчилар, ҳам штаб офицерлари, шунингдек, БМТ миссияларида энг кўп талаб қилинадиган: пиёдалар, тиббий, разведка, муҳандислик бўлинмалари билан таъминлашга тайёр”, дейди парламент палаталарининг қўшма мажлисида Мудофаа вазири Руслан Жақсилиқов.

Вазир 139 нафар ҳарбий хизматчидан иборат биринчи мустақил миллий тинчликпарвар контингентни ҳарбий техника, қурол-яроғ ва мол-мулк билан биргаликда Голан тепаликларида қўзғалувчанликни назорат қилиш учун БМТ миссиясига захира компания сифатида юборилганини алоҳида таъкидлаган.

“Жойлаштириш 2024 йилнинг март ойидан бошлаб амалга оширилиши режалаштирилган. Шу мақсадда БМТ билан томонларнинг мажбуриятларини, шунингдек, контингентнинг миссиядаги иштирокини молиявий ва моддий-техник таъминлаш масалаларини белгиловчи халқаро шартнома тузилади (ратификация қилиниши шарт). Контингент ва техникани ташиш Қозоғистон томони ҳисобидан амалга оширилади”, дея аниқлик киритган вазир.

Жақсилиқовнинг айтишича, 2014 йилдан буён 67 нафар қозоғистонлик зобит БМТнинг Ғарбий Саҳара, Кот-дьИвуар, Мали, Марказий Африка Республикаси ва Ливандаги миссияларида ҳарбий кузатувчи ва штаб офицерлари сифатида қатнашган. 2018 йилдан буён 538 нафар қозоғистонлик ҳарбий хизматчи БМТнинг Ливандаги муваққат кучлари миссиясида тинчликпарвар бўлинма таркибида қатнашган.

Ҳозирда қозоғистонлик ҳарбий хизматчилар БМТ миссияларида хизмат қилмоқда: Ғарбий Саҳрода олти офицер, Марказий Африка Республикасида икки офицер, Конго Демократик Республикасида икки офицер, Ливанда тўққиз нафар ҳарбий хизматчи.