Қозоғистон Россия портлари орқали Европага кўмир етказиб берадиган бўлди

Қозоғистон ҳукумати Қозоғистон кўмирининг Европа Иттифоқига транзити бўйича Россия портлари билан операцияларни тақиқдан озод қилиш бўйича келишувга эришди. Бу ҳақда Қозоғистон Савдо ва интеграция вазирлиги матбуот хизмати хабар берди.

“2025 йилнинг февралида Европа Иттифоқининг 16-санкция пакети доирасида Россиянинг бир қатор портлари билан ҳар қандай транзакцияларни тақиқлаш жорий этилди. Бу Қозоғистон кўмирининг Европа мамлакатларига экспорти барқарорлигига таҳдид туғдирди. Масалан, Уст-Луга порти тарихан Қозоғистон кўмирининг Европага асосий транзит пункти сифатида фойдаланилган”, дейилади вазирлик хабарида.

Бу масалани ҳал қилиш мақсадида Қозоғистон ҳукумати вакиллари Европа томони билан музокаралар ўтказди. Еврокомиссияга санкциялар режимига тегишли ўзгартиришлар киритиш учун расмий сўров юборилди.

“18-санкция пакети доирасида бўлиб ўтган музокаралар якунларига кўра, Европа томони Қозоғистон кўмирининг транзити бўйича Россиянинг айрим портлари билан операцияларни тақиқлашдан озод қилишни назарда тутувчи ўзгартиришлар киритди”, дея тушунтирди матбуот хизмати.

Шу билан бирга, кўмир фақат Қозоғистондан олиниши керак. Юкга эгалик ҳуқуқи чекловчи чоралар қўлланиладиган мамлакатларнинг норезидентларига тегишли бўлиши керак, портлардан фақат транзит, юклаш ёки жўнатиш ҳудуди сифатида фойдаланиш мумкин.

Вазирлик маълумотларига кўра, кўрилаётган чора-тадбирлар Қозоғистон кўмирининг Европа Иттифоқига етказиб берилиши тикланишига, шунингдек, логистика йўналишларининг барқарорлигини мустаҳкамлашга умид қилиш имконини беради.

2024 йилда Қозоғистоннинг Европа Иттифоқига кўмир экспорти ҳажми 5,2 миллион тоннани ёки умумий кўмир экспортининг 51,8 фоизини ташкил этди. 2025 йилнинг январь-май ойларида экспорт 1,6 миллион тоннани ёки умумий кўмир экспортининг 38,5 фоизини ташкил этди.