Қоидабузарлигидан фахрланган “тюнингчи” узр сўраб чиқди (видео)

Қоидабузарлиги билан мақтанган Uzbelas Performance раҳбари Асадбек Жумаев узр сўраб чиқди. Бу ҳақда Ички ишлар вазирлиги хабар берди.

“Авваламбор, нотўғри иш қилганмиз. Интервью қўйган одамни монтажини текшириб кўришимиз керак эди. Лекин шу нарса ўтиб кетиб қолди. Биз вазиятга енгил қараганимиз учун ҳозир азиятини чекяпмиз. Биз бу нарсани умуман тарғиб қилмаганмиз. Ҳар қандай нотўғри хабар тарқатгани учун жазо бор экан. Ҳаммадан узр сўраймиз”, деган Жумаев. 

Эслатиб ўтамиз, жорий йилнинг январь ойида Жумаев суд қарорига асосан Маъмурий жавобгарлик тўғрисидаги кодекснинг 195-2-моддаси (ҳуқуқни муҳ қил органлар ходимларининг фото ва (ёки) видеотасвирини уларнинг обрўсизлантирилишига олиб келадиган тарзда бузиб тарқатиш) билан 8,4 млн сўм жаримага тортилган. 

Воқеадан кейин, унинг ижтимоий тармоқларда тарқалган интервьюси жамоатчиликни кескин эътирозларига сабаб бўлган. 

Жумаев интервьюда бундай қилмиш учун бошқа одамни 15 суткага қамашлари мумкинлигини ўзи эса кичик жарима (8,4 млн) билан қутулиб кетганини айтган. Интервьюда блогернинг “2-3 йилдан кейин шу видеони кўрсангиз қанақа реакция берасиз?” деган саволига Жумаев қилган ишидан фахрланишини айтган.

Шундан сўнг, кеча 26 февраль куни Бош прокуратура ҳолатга қўшимча ҳуқуқий баҳо бериш мақсадида Тошкент шаҳар судининг жиноят ишлари бўйича судлов ҳайъатига протест киритганини маълум қилди.