Қирғизистонда давлат тўнтаришига уриниш бўлди

Қирғизистон Миллий хавфсизлик давлат қўмитаси ходимлари мамлакатда оммавий тартибсизликлар ва ундан кейинги давлат тўнтаришини уюштиришга уринишнинг олдини олди. Бу ҳақда Миллий хавфсизлик давлат қўмитасининг Instagram саҳифасида хабар берилди.

“Миллий хавфсизлик давлат қўмитаси томонидан хавфсизликни таъминлаш, конституциявий тузум ва фуқаролик ҳуқуқларини тажовуз ва бузғунчиликлардан ҳимоя қилиш мақсадида маҳаллий можароларни уюштириш орқали миллатлараро низони қўзғатишга тайёргарлик кўриш, кейинчалик оммавий норозилик намойишлари ва тартибсизликлар ўтказиш ҳолатлари аниқланди ва уларга чек қўйилди. Асосий мақсад ижтимоий-сиёсий вазиятни беқарорлаштириш ва кейинчалик давлат тўнтаришига уриниш эди”, дейилади хабарда.

Миллий хавфсизлик давлат қўмитасининг таъкидлашича, ушбу режаларни амалга оширмоқчи бўлган гуруҳнинг барча иштирокчилари аниқланган ва ҳибсга олинган. Улардан бири Қирғизистондан ташқарида, тахминан БААда бўлган.

“Ушбу гуруҳ ўз ниятларини амалга ошириш учун қирғизистонлик калтакланган ярим яланғоч қизнинг гўёки чет эл фуқаролари томонидан таҳқирланган мурожаати билан боғлиқ сохта провокацион видеони суратга олишни режалаштирган”, деган қўмита.

Билдирилишича, ушбу видеоролик “миллий ватанпарварлик туйғулари”га таъсир қилиши ва “мамлакатнинг уюшмаган ёшлари” вакилларини ғазаблантириши керак эди. Кейин “махсус ўқотар қуроллар билан жиҳозланган жанговар гуруҳлар” ишга кириши керак эди, улар “чет элликларнинг иш ва яшаш жойларида” жанжал ва қирғинларни қўзғатишни режалаштирган. Воқеалар 2024 йил май ойида Бишкекда Жануби-Шарқий Осиё мамлакатлари фуқаролари ҳужумга учраган вайронагарчиликларни такрорлаши керак эди.

“Шунга ўхшаш провокациялар Қирғизистон Республикаси фуқаролари ва ҳуқуқ-тартибот идоралари вакилларига нисбатан режалаштирилган бўлиб, кейинчалик оммавий тартибсизликлар содир этилган. Бу ҳаракатларнинг барчаси мамлакат бошқарув органларини обрўсизлантириш ва аҳолининг норозилигига сабаб бўлиши, мухолифат томонидан молиялаштириладиган кенг кўламли норозилик намойишлари учун қулай шароит яратиши керак эди”, дейилади хабарда.

Қўшимча қилинишича, қўлга олинганларнинг исми ва фамилиялари тергов манфаатларини кўзлаб айтилмаган.

Эслатиб ўтамиз, аввалроқ Тожикистон Олий суди давлат тўнтаришига уриниш бўйича айблов доирасида собиқ ташқи ишлар вазири Ҳамрохон Зарифий ва бошқаларни қамоқ жазосига ҳукм қилганди. Энг узоқ муддат – 27 йиллик қамоқ жазоси собиқ вазирга, шунингдек, парламентнинг собиқ депутати ва Тожикистон демократик партияси раиси Саиджафар Усмонзодага берилган.