Қирғизистонда Бош прокурор ҳам ўзгарди. Навбатдаги номзод – Жапаровнинг таниши

Олам

−

21 Октябрь 2020 visibility8809

Бугун, 21 октябрь куни Қирғизистон Республикаси Бош прокурори Откурбек Жамшитов муддатидан олдин лавозимидан озод этилди. Қирғизистон парламенти аъзолари Откурбек Жамшитовни муддатидан олдин лавозимидан озод этиш учун овоз берган.

Депутатлар йиғилишида маълум қилинганидек, Жамшитов "муддатидан олдин" ва "ўз хоҳишига биноан" ишдан бўшатилган.

Шунингдек, бугуннинг ўзида Қирғизистон Республикасига янги Бош прокурор тайинланди.

Конституциявий қонунчилик, давлат тузилиши, суд-ҳуқуқий масалалар ва регламент қўмитаси Бош прокурор лавозимига Қурманқул Зулушев номзодини маъқуллаган. Қарор қўмитанинг бугунги йиғилишида қабул қилинган.

Қурманқул Зулушев – олтинчи чақириқ Жўқорғи Кенгесининг депутати. Унинг номзодини мамлакат Бош прокурори лавозимига Бош вазир – вақтинча Президент вазифасини бажарувчи Садир Жапаров таклиф қилган.

Маълумот ўрнида, Садир Жапаров жорий йилнинг 14 октябрь куни парламент томонидан Бош вазир лавозимига тасдиқланди. 2017 йилдан Президент лавозимида ишлаб келаётган Сооронбай Жээнбеков истеъфога чиқиши ортидан, Садир Жапаров вақтинча Президент ваколатларини гарданига олди.

Мақола муаллифи