Қирғизистон жазо колонияларини тугатмоқчи

Қирғизистонда колонияларни тугатиш тўғрисидаги қонун лойиҳаси парламентда рўйхатга олинди. Бу ҳақда “24.kg” хабар берди.

Тасдиқловчи ҳужжатга кўра, ушбу турдаги муассасаларда жами маҳкумлар сони кескин камайган ва 2024 йил январь ҳолатига кўра 1303 нафарни ташкил этган, улардан 897 нафари қидирувда бўлган. Шундай қилиб, 10 та колонияда 400 га яқин маҳкум ҳақиқатда жазони ўтамоқда.

У ерда 100 га яқин ходим ишлайди. Уларнинг ишлашини таъминлаш учун ҳар йили республика бюджетидан қарийб 100 миллион сом ажратилади, шундан 85,5 миллиони ишчиларнинг иш ҳақига, қолгани коммунал хизматлар, ходимлар учун ижара ҳақи, жорий таъмирлаш ва ҳоказоларга йўналтирилади.

“Колониялар хавфсизлик ёки қатъий изоляцияни талаб қилмайдиган маҳкумларни сақлайдиган ахлоқ тузатиш муассасаларининг бир тури ҳисобланади. Жазо мақсадларига пробация бўлимининг назорати остида ҳам эришиш мумкин”, деб ҳисоблайди тузатишлар ташаббускорлари.

Қайд этилишича, жазони ижро этиш тизими муассасаларини сақлаш харажатларини камайтириш, шунингдек, ресурслардан фойдаланишни оптималлаштириш мақсадида колониялар институтини бекор қилиш тўғрисидаги норматив-ҳуқуқий ҳужжат лойиҳаси ишлаб чиқилган.

Бундан ташқари, маҳкумларнинг ҳуқуқларини ҳимоя қилиш мақсадида қонун лойиҳасида биринчи инстанциянинг илгари қабул қилинган қарорларини қайта кўриб чиқиш ҳамда реабилитация мезонларига жавоб берадиган ва намунали хулқ-атворини кўрсатган шахсларни шартли равишда озод қилиш имкониятини назарда тутади.