Қичқириқ ва ваҳима: Бангкокдаги бар одамлари билан бирга ёниб кетди (фоторепортаж)

Аввалроқ, Таиланд пойтахти Бангкокдаги барда ёнғин оқибатида 27 киши ҳалок бўлгани ҳақида хабар берилганди. Ҳозирда қурбонларнинг шахси аниқланиб, ҳодиса тафсилотлари ўрганилмоқда. Бу ҳақда “Associated Press” хабар берди.

Маълумотларга қараганда, қурбонларнинг 9 нафари эркак киши, 18 нафари эса аёллар бўлган. 22 киши оғир аҳволда шифохонага етказилган.

Гувоҳларнинг сўзларига кўра, ёнғин аввал бинонинг олд қисмида бошланган ва қисқа вақт ичида бутун залга тарқалган. Ичкарида одамларнинг қичқириғи эшитилиб, ваҳима бошланган.

Ҳодиса жойида ўтказилган текширувларда бино ичида куйган телевизорлар, карнайлар, электр гитара ва бошқа жиҳозлар топилган. Деразалар синган, зал ичидаги стол ва стуллар ёнғиндан зарар кўрган.

Ҳалок бўлганларнинг яқинлари жасадларни аниқлаш учун полиция моргига йиғилган. Расмийлар қурбонларнинг аксарияти 25 ёшдан 50 ёшгача бўлган Таиланд фуқаролари эканини маълум қилган.

Шунингдек, хорижлик фуқаролар орасида жабрланганлар бор-йўқлиги ҳам текширилмоқда. Австралия ҳукумати Таиланд томони билан ўз фуқаролари орасида жабрланганлар бор ёки йўқлигини аниқлаш бўйича иш олиб бораётганини билдирган.

Эслатиб ўтамиз, ҳодиса 13 июлга ўтар кечаси Бангкокнинг шимолий қисмида жойлашган “Rong Beer Na Lat Phrao” барида юз берган.