Қибрайда икки автобуснинг пойга ўйнаши ЙТҲ билан тугади

Кеча, 11 апрель куни Тошкент вилоятининг Қибрай шаҳрида икки йўловчи автобусининг пойга ўйнаши йўл-транспорт ҳодисаси билан якунланди. Бу ҳақда “Тошшаҳартрансхизмат” АЖ матбуот хизмати хабар берди.

Қайд этилишича, 11 апрель куни соат 14:30 атрофида “2-Автобус саройи” филиали ҳайдовчиси Х.У. Isuzu русумли, сарой рақами 235 бўлган автобусни 199-йўналишда Қибрай шаҳри Алишер Навоий кўчаси бўйлаб бошқариб бораётиб, “Макро” дўкони қаршисида Lacetti русумли енгил автомобиль билан тўқнашув содир қилган. Тўқнашув натижасида жароҳат олганлар йўқ.

Ҳозирда, мазкур йўл-транспорт ҳодисаси Йўл ҳаракати хавфсизлиги бошқармаси ходимлари томонидан расмийлаштирилган. Шунингдек, ушбу йўл-транспорт ҳодисаси юзасидан хизмат суриштируви ўтказилганда, ҳайдовчи Х.У. “2-Автобус саройи” филиали ҳайдовчиси А.Ф бошқарувидаги Isuzu русумли сарой рақами 245-бўлган 198-сонли автобус йўналиши билан ўзаро пойга ўйнагани аниқланган.

Йўловчилар ва бошқа йўл ҳаракати иштирокчилари ҳаётини хавф остига қўйгани ҳамда йўл ҳаракати қоидаларига риоя этмагани натижасида йўл-транспорт ҳодисаси содир этгани учун ҳар икки ҳайдовчи билан филиал ўртасида тузилган меҳнат шартномалари бекор қилинган. Автобусга етказилган зарар айбдор ҳайдовчи томонидан ўрнатилган тартибда ундирилади.