“Қайрат” кетма-кет иккинчи марта Қозоғистон чемпиони бўлди

Олмаотанинг “Қайрат” футбол клуби 2025 йилги Қозоғистон Премьер-лигаси (ҚПЛ) мавсумида кетма-кет иккинчи, умумий ҳисобда эса бешинчи бор мамлакат чемпиони бўлди. 

Чемпионлик тақдири чемпионатнинг сўнгги 26-тур доирасидаги “Қайрат” – “Астана” учрашувида ҳал бўлди. Олмаотадаги “Марказий” стадионда кечган баҳс 1:1 ҳисобидаги дуранг билан якунланди ва бу натижа мезбонларга чемпионликни ҳимоя қилиш учун етарли бўлди.

Учрашувнинг 15-дақиқасида меҳмонлар ҳисобни очди. “Астана” сардори Назми Грипшинининг узатмасидан сўнг хорватиялик вингер Марин Томасов  ҳисобни очишга эришди. Бироқ танаффусдан кейин “Қайрат” жавоб қайтарди. 56-дақиқада 17 ёшли ҳужумчи Дастан Сатпаев жарима майдончаси ичидан аниқ зарба йўллаб ҳисобни тенглаштирди.

Ушбу дуранг натижадан кейин “Қайрат” Қозоғистон Премьер-лигасида 59 очко жамғариб, турнир жадвалида биринчи ўринни сақлаб қолди. “Астана” 57 очко билан иккинчи, Қўстанайнинг “Тобол” клуби эса 54 очко билан учинчи ўринни эгаллади.

Шу тариқа, “Қайрат” кетма-кет иккинчи марта Қозоғистон чемпиони бўлди ва 2026-2027 йилги UEFA Чемпионлар лигаси саралаш босқичида иштирок этиш ҳуқуқини қўлга киритди. “Астана” эса ўз иштирокини Конференциялар лигаси саралаш босқичидан бошлайди.

Маълумот учун, Қозоғистон Премьер-лигаси тарихида “Астана” етти марта чемпион бўлиб, энг совриндор клуб ҳисобланади. “Қайрат” эса бешта чемпионлик билан “Актўбе” ва Павлодарнинг “Иртиш” клублари билан иккинчи ўринни бўлишиб турибди.

Эслатиб ўтамиз, аввалроқ Швециядаги Мьельбю шаҳарчасининг аҳолиси 1400 нафардан кам бўлган балиқчилар қишлоғи жамоаси илк бор Швеция чемпионлигини қўлга киритган эди.