Қашқадарёда профилактика инспектори пичоқланди

Қашқадарё вилоятида эркак оилавий жанжални тўхтатмоқчи бўлган профилактика инспекторини пичоқлади. Бу ҳақда ИИВ Жамоат хавфсизлиги департаменти матбуот хизмати хабар берди.

Маълум қилинишича, Қамаши туманидаги ҳодиса эр ва хотин ўртасидаги жанжалдан бошланган. Аёл эри билан яшамаслигини билдириб, ўз уйига кетмоқчи бўлган. Аммо эр бунга қаршилик қилиб, жанжал чиқарган ва фарзандини қўлига олиб, агар аёли кетиб қолса, ўзини ва фарзандини ўлдиришини айтган.

Аёл эса ИИОга қўнғироқ қилиб, ёрдам сўраган. Воқеа жойига бир нечта профилактика инспекторлари келиб, эркакнинг қўлидаги пичоқни олиб қўйишга ҳаракат қилаётганида эркак ходимлардан бирининг бел қисмига пичоқ санчиб олган. Ходим тан жароҳати билан шифохонага мурожаат қилган.

“Ҳозир соғлигим яхши, шифокорлар ёрдам кўрсатди”, дейди жароҳатланган ходим.

Мазкур ҳолат юзасидан тегишли ҳужжатлар расмийлаштирилиб, Қамаши тумани прокуратурасига юборилган.

Бош прокуратура матбуот котиби Ҳаёт Шамсутдиновнинг маълум қилишича, эркакка нисбатан Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Гумонланувчи шахс процессуал тартибда ушланган. Ҳозирда тергов ҳаракатлари давом этмоқда.

Эслатиб ўтамиз, 2024 йилнинг 14 апрель куни Тошкентда “участковой” пичоқланганди. Тан жароҳати олган профилактика инспектори шифохонага олиб борилган ва унга тиббий ёрдам кўрсатилган.