Исроилнинг шифохона яқинига берган зарбаси оқибатида 5 журналист ҳалок бўлди

“Al-Quds Today” нашри журналистлари Ғазодаги Аль-Авда шифохонасида юз бераётган воқеаларни ёритаётган вақтида уларнинг транспорт воситаси Исроил ҳаво ҳужумига учради. Бу ҳақда “Al-Jazeera” нашри хабар берди.

Қайд этилишича, ҳужум оқибатида журналистлар Фади Ҳассоуна, Ибраҳим ал-Шеикҳ Али, Моҳаммад ал-Ладаҳ, Фаисал Абу ал-Қумсан ва Айман ал-Жади ҳалок бўлган. “Al-Jazeera” журналисти Анас ал-Шарифнинг хабарига кўра, воқеа Айман ал-Жади шифохонада хотини биринчи фарзандини дунёга келтираётган вақтида содир бўлган.

Ижтимоий тармоқларда тарқалган видео тасвирларида ёнаётган транспорт воситаси тасвирланган. Оқ рангли фургондан олинган экраннинг сурати орқасида “пресс” сўзи катта қизил ҳарфлар билан ёзилган.

Ҳалок бўлган журналистларнинг жасадларини фуқаролик мудофаа гуруҳлари олиб чиққан ва воқеа жойидаги ёнғинни ўчирган.

Исроилнинг ҳарбий кучлари ҳужумни “мақсадли” деб атаб, бу транспорт воситасида "террорчилар" борлигини айтган.

Маълумот учун, Журналистларни ҳимоя қилиш қўмитаси (CPJ) шу ой бошида Исроилнинг бир ҳафта ичида тўрт фаластинлик журналистни ўлдиришини қоралаб, халқаро ҳамжамиятни яҳудий давлатини оммавий ахборот воситаларига қарши олиб бораётган ҳужумлар учун жавобгарликка тортишга чақирган эди. CPJ маълумотларига кўра, 2023 йил 7 октябрдан бошлаб Исроилнинг Ғазога босқинида камида 141 журналист ҳалок бўлган.

Эслатиб ўтамиз, аввалроқ “Чегара билмас мухбирлар” 2024 йилда 54 нафар журналист касбий фаолияти ортидан вафот этганини маълум қилганди.