“Исроилнинг абадийлигини таъминлаймиз”. Нетаньяху баёнот билан чиқди

Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Бу ҳақда бугун, 28 февраль куни Исроил Бош вазири Биньямин Нетаньяху баёнот билан чиқди.

“Менинг биродарларим, Исроил фуқаролари, бугун Исроил ва АҚШ Эрондаги террор режими келтириб чиқарадиган экзистенциал таҳдидларни бартараф этиш бўйича операция бошлади. Дўстимиз, Президент Дональд Трампга “тарихий етакчилик” учун миннатдорлик билдираман”, деган Бош вазир. 

Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

“Биз Эронни бутун инсониятга таҳдид солиши мумкин бўлган ядро қуроли билан қуролланишига йўл қўймаслигимиз керак”, дейди Нетаньяху.

Унинг билдиришича, операция Эроннинг ядро салоҳиятини чеклаш ва минтақавий хавфсизликни мустаҳкамлашни мақсад қилган. Шунингдек, Исроил ҳукумати Эрон халқининг ўз тақдирини мустақил белгилаши учун шароит яратишга умид қилмоқда.

Нетаньяху мурожаатида Эрон жамиятининг турли қатламларига – форслар, курдлар, озарбайжонлар, балужлар ва аҳвозийлар вакилларига алоҳида тўхталиб, уларни “истибдод бўйинтуруғини улоқтириб ташлаб, эркин ва тинчликка интилаётган Эронни барпо этишга” чақирди.

Бош вазир Исроил фуқароларини Ички фронт қўмондонлиги кўрсатмаларига қатъий риоя қилишга даъват этди.

“Биз биргаликда курашамиз ва биргаликда Исроилнинг абадийлигини таъминлаймиз”, дея сўзини якунлаган Нетаньяху.

Эслатиб ўтамиз, аввалроқ АҚШ Президенти Дональд Трамп Эрон ҳудудида Исроил билан биргаликда ҳарбий амалиёт бошланганини эълон қилганди. У ўз баёнотида эронликларни амалдаги тузумни ағдаришга чақирган.