Исроилни йўқ қилиш минтақа муаммоларини ҳал қилишнинг калитидир – Яман расмийси

Яман Олий сиёсий кенгаши котиби Ясир ал-Хурий Яман халқи нафақат Ғазо сектори аҳолисини қўллаб-қувватлаш бўйича олиб бораётган амалиётларининг оқибатларидан қўрқмаётгани, балки уларни кенгайтириш ва мустаҳкамлаш имкониятларини ҳам ўрганаётганини айтди. Бу ҳақда у бугун, 26 июль куни ИРНАга берган интервьюсида сўз очди.

“Яман халқи Тангрига иймон келтирган ҳолда, ўз раҳбарлари ва амалдорлари билан ҳамжиҳатликда, мазлум Фаластин халқи ва Ғазо сектори аҳолисини бор куч ва имкониятлари билан қўллаб-қувватламоқда”, деган Ясир ал-Хурий.

Ал-Хурийга кўра, Фаластин ва Ғазо секторидаги ҳозирги вазият бир неча жиҳатларга эга. Асосийси – ўз юртига содиқ қолган ва ҳайдаш ёки кўчиришнинг ҳар қандай шаклини рад этувчи аҳолига таъсир қиладиган очарчилик.

Унинг таъкидлашича, яна бир жиҳати Ғазо сектори аҳолисига содир этилган геноцид ва қирғинлар, бу жиноятларнинг бир қисми гуманитар ёрдам ниқоби остида содир этилган. Учинчи жиҳат эса Фаластин халқининг қаҳрамонона чидамлилиги ва қаршилиги.

“Биринчи икки саҳна араб ва ислом режимларининг хиёнати, шунингдек, халқаро ҳамжамиятнинг шармандали сукути ва шериклиги оқибатидир”, деган Яманнинг “Ансоруллоҳ” ҳаракатининг юқори мартабали расмийси.

Ал-Хурий нутқининг яна бир қисмида Фаластин ишғоли бошлангандан бери исломий давлатлар бирлашиб, қаршилик кўрсатмаётгани минтақадаги муаммолардан бири эканини айтди.

“Бу муаммонинг ягона ҳақиқий ечими Фаластиндаги жиноятлари ва оммавий қотилликлари бутун дунёга аён бўлган сионистик режимни йўқ қилишдир. Бу мақсадга эришиш фақат ислом дунёсининг уйғониши ва сионистик режимнинг жиноий моҳиятини тан олиш орқали мумкин бўлади”, деб таъкидлади у.

Эслатиб ўтамиз, аввалроқ Исроил кучлари Ғазонинг марказий қисмидаги Дайр ал-Балаҳ шаҳрида 20 ойдан ортиқ вақт давомида ҳеч қандай жанговар жанг бўлмаган ҳудудда қуруқликдан ва ҳаводан операция бошлагани ҳақида хабар берилганди.