Исроил ва ҲАМАС ўртасидаги музокараларнинг биринчи босқичи бўлиб ўтди

Кеча, 6 октябрь куни Исроил ва ҲАМАС ўртасида можарони тинч йўл билан ҳал этишга қаратилган биринчи босқич музокаралар Мисрнинг Шарм-ал-Шайх шаҳрида бўлиб ўтди ва “ижобий муҳитда” якунланди. Бу ҳақда “Al Jazeera” хабар берди.

Музокараларда ҲАМАС вакиллари гаровга олинганларни озод этиш тартиби, шунингдек, Исроил қўшинларини Ғазо секторидан олиб чиқиш режаси ва жадвали бўйича ўз қарашларини баён қилган. 

Қолаверса, ҲАМАС Исроил доимий сулҳга амал қилиши ва қўшинларини тўлиқ олиб чиқишига ишонч билдириш кераклигини таъкидлаган. Шунга қарамай, биринчи босқич музокаралари ижобий руҳда якунлангани хабар қилинган.

6 октябрь куни бошланган музокараларда Трамп маъмурияти томонидан 29 сентябрь куни тақдим этилган 21 банддан иборат тинчлик режаси муҳокама қилинган. Режада ҲАМАС томонидан асирга олинган исроилликларни озод қилиш ва Исроил армиясини босқичма-босқич Фаластин ҳудудидан олиб чиқиш кўзда тутилган. Исроил эса эвазига умрбод қамоқ жазосини ўтаётган 250 нафар фаластинлик маҳбусни озод қилиши керак.

Исроил Бош вазири Биньямин Нетаньяху жорий йилнинг сентябрь ойи охирида, Вашингтонга ташрифи чоғида Трампнинг режаси маъқул келганини айтган эди. Октябрь бошида ҲАМАС вакиллари ҳам режадаги айрим бандларга қисман рози бўлди.

Томонлар 7 октябрь куни мулоқотни давом эттириши кутилмоқда. Трамп эса яқин орада томонлар келишувга эришишига умид билдирган.

Қайд этиш жоиз, 2023 йилнинг 7 октябрь куни ҲАМАСнинг Исроилга уюштирган ҳужуми Яқин Шарқдаги кескинликнинг бошланиш нуқтаси бўлди. Бўлинмалар ракета зарбалари бериб, Исроил ҳудудига бостириб кирди ва замонавий Исроил тарихидаги энг йирик тинч аҳоли қирғинини содир этди – тахминан 1200 киши ҳалок бўлган. 250 дан ортиқ гаровга олинганлар Ғазо секторига олиб кетилди, уларнинг бир қисми кейинчалик алмашилган ёки озод қилинган, бир қисми эса ҳалок бўлган.

Исроил бунга жавобан ҲАМАСга қарши уруш эълон қилди. Можаро давомида Ғазо секторида 67 мингдан ортиқ фаластинликлар ҳалок бўлган, 162 мингдан зиёди яраланган. 

Бугун, 7 октябрь куни можаронинг “старти”га ҳам 2 йил тўлди. Шу икки йил мобайнида Ғазодаги мактаб, масжид, ўқув даргоҳлари ва ижтимоий аҳамиятга эга инфратузулмалар таг-туги билан йўқ қилинди, бузилди, портлатилди.