Исроил қандай жамоа?

Спорт

Ўзбек футболи тарихидаги энг яхши натижалардан бири такрорланиши мумкин. 2011 йилда Алексей Евстафеев бошчлигидаги 17 ёшгача бўлган жамоа Мексикадаги кичик мундиалда чорак финалгача боришни уддалаганди. Равшан Ҳайдаров мураббийлигидаги U-20 жамоа эса Исроил тўсиғидан ўтса, тарихий натижа такрорланади.

8 йиллик танаффусдан сўнг, U-20 жамоа яна Жаҳон чемпионатига йўл олди ва нимчорак финалга чиқишни уддалади. 

Исроил ўзи қандай жамоа? 

Мазкур юрт жамоаси ҳақидаги маълумотлар барчага қизиқ бўлса керак. QALAMPIR.UZ ушбу жамоа ҳақида айрим маълумотларни тақдим этади.

Исроил U-20 терма жамоаси ўтган йили Европа чемпионатида 2-ўринга эга чиқиб, ўз тарихида биринчи бор Жаҳон чемпионатида иштирок этиш ҳуқуқини қўлга киритган эди. Жамоанинг дунё биринчилигидаги дебюти омадли чиқди. 3 та ўйинда уч хил натижа қайд этган Исроил якунда қийин гуруҳдан чиқишни уддалади. Исроилликлар Колумбия, Сенегал ва Япония каби кучли жамоалар ўрин олган квартетдан кейинги босқичга чиқа олди. Жамоанинг Японияга қарши ўйинда кўрсатган характерини эса футбол мутасаддилари алоҳида эътироф этди.

Исроил U-20 терма жамоасининг Жаҳон чемпионатида иштирок этаётган таркиби “Transfermarkt” версияси бўйича 3,1 млн еврога баҳоланмоқда. Жамоадаги энг қиммат футболчи Став Лемкин ҳисобланади. Унинг нархи 500 минг еврони ташкил этади.

Исроил жамоаси асосий қисми маҳаллий чемпионатда тўп сураётган футболчилардан иборат. Легионерлардан эса фақатгина Нидерландиянинг ПСВ жамоасида ўйнаб келаётган Таи Абедни кўрсатиш мумкин. Шунингдек, Исроилнинг бутун бошли Ўзбекистон U-20 терма жамоасидан қимматроқ бўлган футболчиси, Оскар Глух Европа чемпионатида қатнашган эди. Бироқ уни амалдаги клуби “Зальцбург” Жаҳон чемпионатига жўнатишни хоҳламади.

Исроил U-20 терма жамоасини айни вақтда 52 ёшли маҳаллий мутахассис Офир Ҳаим бошқармоқда. Офир мураббийликни фаолиятини тўлиқлигича Исроилда олиб бормоқда. У Исроил ёшларига 2021 йилдан бери мураббийлик қиляпти.

Футболчиларимизга қарши ўйин олдидан Исроил U-20 терма жамоасида битта йўқотиш бор. Японияга қарши ўйинда майдондан четлатилган Ран Бинямин Равшан Ҳайдаров шогирдларига қарши ўйинда майдонга туша олмайди.


Мақола муаллифи

Теглар

футбол Исроил

Баҳолаганлар

0

Рейтинг

3

Мақолага баҳо беринг

Дўстларингиз билан улашинг