Исроил икки ойда 75 журналистни ўлдирди

Кеча, 8 декабрь куни Фаластин Журналистлари синдикатининг маълум қилишича, сўнгги икки ой ичида Исроилнинг Ғазони бомбалаши натижасида камида 75 нафар фаластинлик журналист ва ОАВ ходимлари ҳалок бўлган.

Синдикат ўз баёнотида журналистларни нишонга олиб, ишғол кучлари бегуноҳ фаластинликлар, уларнинг мулклари, шифохоналар, мактаблар, черковлар ва масжидларга қарши жиноятлар, қирғинлар, этник тозалаш ва геноцидлар ҳақидаги ҳақиқатни яширишга ҳаракат қилаётганини тасдиқлади.

Маълумотларга кўра, Исроил ишғоли 60 нафар журналистнинг уйи, 63 та медиа муассасаси ва идорасини нишонга олган, 25 та маҳаллий радиостанция (Ғазода 24 та ва Ғарбий Соҳилда битта) ишини тўхтатган.

“Исроил ҳарбий самолётлари томонидан 60 нафар журналистнинг уйи нишонга олинди, 63 та матбуот органининг қароргоҳи вайрон қилинди”.

Шунингдек, халқаро ҳамжамиятни уруш зоналарида ишлаётган журналистларни ҳимоя қилиш учун зудлик билан аралашуви сўралган.

Унда ишғол кучларининг 43 журналистни (41 нафари Ғарбий Соҳилда, 2 нафари Ғазо секторида) ҳибсга олганига диққат қаратилди.

30 нафар журналист ҳамон ҳибсда сақланмоқда, уларнинг аксарияти айбловсиз ва судсиз маъмурий қамоққа олинган.

Журналистлар синдикати фаластинлик журналистларнинг хавф-хатарларга қарамай қилган қаҳрамонликларини олқишлади.

Британиялик журналист Пирс Морган ҳам Исроилнинг Ғазога ҳужумини ёритган фаластинликларга ойдинлик киритиб, ноябр ойи журналистлар учун тарихдаги энг ҳалокатли ой бўлганини айтди. Журналистларни ҳимоя қилиш қўмитаси (CPJ) маълумотларига кўра, 2022-йилда бутун дунё бўйлаб энг  хавфли касблар рўйхатига киритилган 68 нафар оммавий ахборот воситалари ходими ўлдирилган эди.

Эслатиб ўтамиз, аввалроқ Ғазодаги жангларда Исроил вазирининг ўғли ҳалок бўлгани ҳақида хабар берган эдик.