Исроил Ғазодаги можарони кучайтирмоқчи – WSJ

Исроил ҳукумати ҲАМАС ҳаракати билан можарони кучайтириш ва Ғазо секторида гаровда сақланаётган шахсларни қайтариш мақсадида унга босим ўтказиш режасини ишлаб чиқмоқда. Бу ҳақда манбаларга таяниб, “The Wall Street Journal” хабар берди.

Нашрга кўра, ўтган ҳафта анклавдаги назорат-ўтказиш пунктлари ёпилганидан сўнг Исроил ҳукумати Ғазо секторига электр энергияси ва сув етказиб беришни тўхтатиши мумкин. Агар бу чоралар самара бермаса, Исроил ҳаво ҳужумларини ва анклавда тактик операцияларни қайта бошлаши мумкин. Бундан ташқари, яҳудий давлати отишмалар тўхтатилган пайтда ўз уйларига қайтган юз минглаб фаластинликларни яна кўчиб кетишга мажбурлаши эҳтимолдан холи эмас.

Нашрнинг ёзишича, гаровга олинган шахсларнинг озод этилиши борасида ривожланиш кузатилмаса, вақт ўтиши билан Исроил ҳукумати Ғазо секторида янада жиддий ҳарбий ҳаракатларни амалга оширишга ўзига рухсат бериши мумкин. Чунки, 2023 йилнинг октябрига қараганда, ҳозирда Исроилнинг қурол-яроғ ва ўқ-дорилар захираси тўлдирилган, АҚШ Президенти Дональд Трамп яҳудий давлатига босим ўтказишни тўхтатган ва Исроил армияси Ливан чегарасида катта миқдордаги қўшин сақламасликка имкон топган.

Эслатиб ўтамиз, жорий йилнинг январь ойи ўрталарида Исроил ва ҲАМАС Миср, Қатар ҳамда АҚШ воситачилигида сулҳ режимини жорий этишга келишиб олган эди. Сулҳ 19 январда кучга кирди. Ушбу келишувнинг биринчи босқичи 1 мартда якунланди ва бу вақт ичида 42 кун мобайнида Исроилга 33 нафар гаровга олинган шахс қайтарилди. 2 март куни Исроил Ғазога гуманитар ёрдам етказиб беришни тўхтатди ҳамда анклавдаги барча назорат-ўтказиш пунктларини ёпди. Бу чоралар ҲАМАСнинг АҚШ Президентининг махсус вакили томонидан таклиф қилинган сулҳ бўйича музокараларни давом эттириш режасини рад этгани ортидан амалга оширилган.