Исроил Эрон ядровий объектларига зарба беришга тайёрланмоқда

Исроил ҳарбий-ҳаво кучлари Эрон ядро иншоотларига зарба бериш учун тайёргарлик кўрмоқда. Бу ҳақда “The Times of Israel” хабар берди.

Нашр маълумотларига кўра, Эроннинг “изоляцияси” уни ядровий дастурини янада ривожлантиришга ундаши мумкин ва бундай ривожланиш билан Исроил сиёсий раҳбарияти профилактик зарбалар беришни буюриши мумкин.

“Исроил ҳарбий-ҳаво кучлари Яқин Шарқда Теҳрон томонидан қўллаб-қувватланаётган гуруҳлар заифлашгани ва Сурияда Асад режими қулаганидан кейин Эрон ядровий иншоотларига эҳтимолий ҳужумларга тайёргарлик кўришда давом этмоқда”, дейилади хабарда.

Шунингдек, Исроил томони Яқин Шарқдаги кескин ўзгаришлар, хусусан, Асад режимининг қулаши муносабати билан Исроил ҳарбийлари Эроннинг ядровий объектларига зарба бериш имконияти мавжуд деб баҳолаган.

Нашрга кўра, Сурия ҳаво мудофааси устунлиги сабаб Исроил томон Эронга зарба йўллай олмаган, лекин Асад режими қулагани сабаб Исроил ҳарбий-ҳаво кучлари ўзининг жанговар шайлигини ва эҳтимолий зарбаларга тайёргарлигини оширишда давом этмоқда.

Эслатиб ўтамиз, 8 октябрь куни тунда Исроил армияси Дамашқдаги Эрон элчихонасига яқинига авиазарба берганди. Қайд этилишича, нишон Дамашқ ғарбидаги Мезза маҳалласидаги тураржой биносига қаратилган. Эроннинг Суриядаги элчихонаси ҳужум содир бўлган жойга яқин жойлашган.