Isroil-Eron urushi tufayli futbol o‘yinlari bekor qilindi

Bugun, 28 fevral kuni Isroil va Eron o‘rtasidagi urush tufayli kun doirasida bo‘lib o‘tishi belgilangan Isroil futbol ligasi o‘yinlari bekor qilindi. Bu haqda Isroil professional futbol ligasi matbuot xizmati xabar berdi. 

“Frontorti qo‘mondonlik ko‘rsatmalariga muvofiq, bugungi o‘yinlar bekor qilinadi”, deyiladi rasmiy bayonotda.

Mazkur kunda milliy chempionatning oliy divizionida beshta uchrashuv o‘tkazilishi rejalashtirilgan edi. O‘yinlarning yangi joyi va sanalari hozircha e’lon qilinmagan.

Bugun, 28 fevral kuni ertalab AQSH va Isroil Eron hududiga qarshi harbiy operatsiya boshladi. Vaziyat keskinlashishi ortidan Isroil havo maydonini vaqtincha yopdi va mamlakatda favqulodda holat e’lon qilindi. Shuningdek, ommaviy yig‘ilishlar, maktablarda darslar hamda ayrim ofis faoliyatlari to‘xtatildi. Quddusda tushdan oldin portlashlar ovozi eshitilgani ma’lum qilingan.