Isroil hujumida husiylar yetakchisi halok bo‘ldi – OAV

Isroilning Yaman poytaxti Sana shahriga bergan havo hujumi oqibatida Yamandagi husiylar harakati tomonidan tuzilgan hukumat bosh vaziri Ahmad G‘olib al-Rahaviy halok bo‘ldi. Bu haqda bugun, 29 avgust kuni al-Rahaviy oilasiga yaqin manbaga tayanib, axborot agentliklari xabar berdi.

Manbaga ko‘ra, havo hujumi isroillik jangchilar tomonidan Xadda hududidagi uyga berilgan. Oqibatda to‘rt kishi, jumladan, bosh vazir va uning bir necha sheriklari halok bo‘lgan.

Qayl etilishicha, husiylar harakati uning o‘limi haqida rasman e’lon qilishga hozirlik ko‘rmoqda. Ahmad G‘olib al-Rahaviy 2024 yil 10 avgustda husiylar hukumati rahbari etib tayinlangan edi.

Al-Rahaviy husiylar harakati Tel-Avivdagi Ben Gurion aeroportiga “Palastin-2” gipertovushli raketasi yordamida hujum qilingani haqida xabar berganidan bir kun o‘tib o‘ldirilgan. Bir kun avval Isroil Sanadagi husiylar pozitsiyalariga 12 marta havo hujumi uyushtirdi.