Исроил ҲАМАСнинг снайпер тузилмалари қўмондони ўлдирилганини айтди

Бугун, 10 ноябрга ўтар кечаси ҲАМАС шимолий бригадасининг снайпер тузилмалари қўмондони йўқ қилинди. Бу ҳақда Исроил армияси матбуот хизмати хабар берди.

"Разведка маълумотларига кўра, ҲАМАС шимолий бригадасининг снайпер бўлинмалари бошлиғи Муҳаммад Калоут йўқ қилинди. ЦАҲАЛ тунда Исроил аскарларига ҳужум қилишни режалаштирган 19 нафар ҲАМАС жангарисига зарба берди", дейилади баёнотда.

Исроил сўнгги 24 соат ичида ЦАХАЛ томонидан 7 октябрдаги ҳужумда қатнашган кўплаб ҲАМАС вакиллари йўқотилганини даъво қилмоқда.

“Йўқ қилинганлар орасида рота командири Аҳмад Мусо ва взвод командири Умар Ал-Ҳинди ҳам бор, уларнинг иккаласи ҳам Ғарбий Жабалияда эди. Мусо Зиким базасига бостириб кирган жангарилардан бири эди. Сўнгги кунларда у Ғарбий Жабалия ҳудудида ЦАХАЛ қўшинларига ҳужум уюштирган”, дея қўшимча қилган Исроил армиясининг матбуот хизмати.

Эслатиб ўтамиз, олдинроқ Исроил армиясининг энг яхши снайпери Бариба Яриэля ўлдирилгани хабар қилинганди.