Исроил ҲАМАС ракеталарни болалар тўшаги остига яшираётганини иддао қилмоқда

Исроил армияси Ғазо секторидаги уйлардан бирида болалар тўшаги остига яширилган ракеталарни топганини маълум қилди. Бу ҳақда армия матбуот хизмати хабар берди.

Унга кўра, яҳудий давлати ҳарбийлари Ғазо секторидаги уйлардан бирида тинтув ўтказиш вақтида тўшаклар остига яширилган катта миқдордаги қурол-яроғлар, жумладан, ракеталар, портловчи қурилмалар ва ўнлаб килограмм портловчи моддаларни топган.

Уларнинг сўзларига кўра, мазкур қурол-яроғлар ҲАМАСни қўллаб қувватловчи фаластинликларнинг кейинроқ етказиб бериш учун мўлжалланган захираси бўлган. Қўшимча қилинишича, қуроллар тезкор ҳаракатлар давомида йўқ қилинган.

“Ракеталар 551-бригада бўлинмалари томонидан ўтказилган операция чоғида фаластинлик шахснинг уйидаги болалар ётоқхонасидан, тўшак ичидан топилган. Эркак ташкилотнинг таҳминий аъзоси бўлган”, дейилади хабарда.

Бундан ташқари, армия матбуот хизмати араб тилидаги суҳбатнинг аудиоёзувини ҳам эълон қилган. Исроил ҳарбийларига кўра, бу ҲАМАСнинг икки аъзоси ўртасидаги ёзиб олинган суҳбати. 

Матбуот хизмати, шунингдек, ўзида мазкур аудионинг таржимаси борлиги ва унда ҲАМАС жангчилари болалар аравасига қандай қилиб қурол яширишни маслаҳатлашгани қайд этилганини иддао қилмоқда.

Эслатиб ўтамиз, 15 ноябрга ўтар кечаси Исроил ҳарбийлари Ғазо секторидаги “Аш-Шифа” тиббиёт маркази ҳудудида қуруқликдаги операцияни бошлаганди. Исроил мудофаа кучлари шифохонада ҲАМАСнинг асосий қўмондонлик штаб-квартираси жойлашгани, шунингдек, тиббиёт маркази остида 200 га яқин ҲАМАС тарафдорлари яширингани ва 7 октябрь куни ўғирлаб кетилган гаровга олинганлар сақланаётган бир неча ерости мажмуалари ва туннель борлигини даъво қилганди.