Исроил ҲАМАС армиясини йўқ қилишни якунлаш арафасида – Нетаньяху

Исроил армияси ҲАМАСнинг Ғазо секторидаги ҳарбий тузилмасини йўқ қилиш ишларини якунлаш арафасида, унинг қолдиқларига қарши зарбалар давом этади. Бу ҳақда яҳудий давлати Бош вазири Биньямин Нетаньяху маълум қилди.

“Кеча мен Ғазо армияси дивизияси жойлашган жойга сафардан қайтдим, у ерда Рафаҳда олиб борилаётган жангларда жуда катта ютуқларга гувоҳ бўлдим. Биз ҲАМАС армиясини йўқ қилиш босқичини якунлаш арафасидамиз, унинг қолдиқларига зарбалар давом этади”, дейди у Исроил мудофаа кучлари Миллий хавфсизлик коллежи талабалари билан учрашувда.

Нетаньяхунинг қайд этишича, ҳарбийлар билан мулоқотдан сўнг у қўмондонларининг жанговар руҳига қойил қолган.

“Бу фикр билан биз барча мақсадларимизга – ўғирланганларни қайтариш, ҲАМАСнинг ҳарбий ва бошқарув имкониятларини йўқ қилиш, Ғазонинг Исроилга хавф туғдирмаслигини таъминлаш, жануб ва шимолдаги жамоаларимиз аҳолисини уйларига хавфсиз тарзда қайтаришга эришамиз", дея қўшимча қилди Бош вазир.

Ўз навбатида, Нетаньяху идораси маслаҳатчиси Дмитрий Генделман бир вақтнинг ўзида "Ғазодаги шиддатли ҳарбий амалиётлар босқичи ўз якунига яқинлашаётганини", шундан сўнг Исроил қўшинлари анклавдаги ҳарбий амалиётларнинг янги босқичини бошлашини айтди.

“Тез орада ЦАХАЛ кейинги босқичга ўтади, ҳар қандай ҳолатда ҳам, урушнинг мақсадлари ўзгаришсиз қолади: ўғирлаб кетилган барча 120 исроилликни қайтариш, ҲАМАС кучини йўқ қилиш, Ғазо секторини демилитаризация қилиш, жанубий ва шимолдаги уйларидан яшаш жойларига қочиб кетган барча фуқароларни қайтариш”, деб ёзган у ўзининг Telegram-каналида.

Эслатиб ўтамиз, Нетаньяху олдинроқ ҳам Ғазо секторида Исроил ва ҲАМАС ҳаракати орасидаги фаол кураш босқичи тез орада тугашини айтганди. Туркия Президенти Ражаб Тойиб Эрдўған эса Исроилни Ливанга қарши урушни кенгайтираётганликда айблади.“Bild” газетаси дипломатик доиралардаги манбаларига таяниб, Исроил июль ойининг иккинчи ярмида Ливан жанубида “Ҳизбуллоҳ”га қарши қуруқликдаги операцияни бошлаши мумкинлиги ҳақида ёзди.