Испаниядан жавоб: Энди Италиядан келаётганлар чегара назоратидан ўтади

Испания ҳукумати Италия билан ноқонуний миграция масаласидаги низо фонида Италиядан келаётган самолёт ва кемалар йўловчилари учун чегара назоратини жорий қилишини маълум қилди. Бу ҳақда “Reuters” хабар берди.

Қайд этилишича, назоратлар эртага, 9 август куни ярим тундан 7 сентябрга қадар амал қилади. Назоратда Италиядан келаётган йўловчиларнинг паспорти, фуқаролиги ва визалари текширилади.

Испания ҳукумати бу чорани Италия томонидан келаётган “ноқонуний миграция босими сақланиб қолаётгани” билан изоҳлаган. Мамлакат расмийларининг маълум қилишича, чоралар Италия ўз навбатида Испаниядан келаётган йўловчиларга нисбатан жорий қилган назоратларни сақлаб турган даврда амал қилади. Рим ушбу назоратларни 30 июль куни Испаниянинг Африкадаги Сеута анклавига 72 минг нафар мигрант оммавий равишда кириб келгани билан боғлиқ хавфлар сабаб жорий қилган.

Кеча, 7 август куни Италия Испаниянинг “ультиматум ёки босими”га бўйсунмаслигини ва мамлакатдан келаётган йўловчилар учун чегара назоратини камида 15 августга қадар сақлаб қолишини маълум қилган.

Испания эса аввалроқ Рим 9 август кунига қадар чегара назоратини бекор қилмаса, Италиядан келаётган йўловчиларга нисбатан худди шундай чоралар жорий этиш билан таҳдид қилган эди.

Италия ҳукумати эса ўз қарорини фақат хавфсизлик ёки терроризм билан боғлиқ хатарлар мавжуд эмаслигига, янги миграция оқими кузатилмаётганига ва ноқонуний мигрантлар Европа ҳудуди томон ҳаракатланмаётганига ишонч ҳосил қилганидан кейингина қайта кўриб чиқишини билдирган.

Эслатиб ўтамиз, аввалроқ Африка қирғоқларининг шимолида жойлашган ва Марокаш билан чегарадош бўлган Испаниянинг Сеута автоном шаҳрига 49 мингдан ортиқ ноқонуний мигрант бостириб кирганди. 

Ҳодисадан сўнг Сеутада полиция ва ҳарбий патруллар кучайтирилган. Денгиз соҳилида 500 метрлик сузувчи тўсиқ ўрнатилган. Шунингдек, Европа Иттифоқининг 22 давлати ташқи чегараларни муҳофаза қилиш бўйича мувофиқлаштирилган чоралар кўришга чақирган. Италия эса Испания билан Шенген ҳудудидаги паспортсиз ҳаракатланиш тартибини бир ойга тўхтатганди.