iPhone 16 тақдимоти қачон бўлиши айтилди

Apple 10 сентябрь куни iPhone ва бошқа янги маҳсулотларнинг йиллик тақдимотини ўтказади. Бу ҳақда “Bloomberg” хабар берди.

Тадбир давомида компания iPhone 16, Apple Watch Series 10 ва асосий Air Pod’ларнинг янги авлодини тақдим этишни режалаштирмоқда. Бундан ташқари, ушбу минигарнитуралар линияси биринчи марта иккита версияда тақдим этилади.

Ўнинчи авлод Apple Watch каттароқ экран ва ингичка корпусга эга бўлиши кутилмоқда. Янги iPhone 16 модулларнинг вертикал жойлашуви билан янгиланган камера дизайнига эга бўлади. Pro версияларида эса каттароқ экранлар ва яхшиланган камералар ўрнатилади. Шу билан бирга, бутун iPhone 16 линияси Apple Intelligence AI тизимини қўллаб-қувватлайди, аввалги моделларда эса AI фақат iPhone 15 Pro ва Pro Мах’да ишлаган.

iPhone 16 бутун дунё бўйлаб 10 сентябрдаги тақдимотдан ўн кун кейин, 20 сентябрда сотувга чиқиши мумкин. 

Бундан ташқари, таъкидланишича, Apple компаниясининг М4 чиплари билан тўртта янги Mac компьютер моделларини ички синовдан ўтказишни кучайтирмоқда. Гап Mac mini, иккита MacBook Pro ва iMac ҳақида кетаётгани тахмин қилинмоқда. Бироқ янгиланган компьютерлар тақдимоти кейинроқ, эҳтимол 2024 йил октябрь ойида бўлиши мумкин.