Interpol qidiruvida bo‘lgan o‘zbekistonliklar AQSH va Turkiyadan topildi

Jinoyat sodir qilib, xalqaro qidiruvga berilgan o‘zbekistonlik fuqarolar Turkiya hamda Amerika Qo‘shma Shtatlaridan topildi. Bu haqda O‘zbekiston Ichki ishlar vazirligi xabar berdi.

Qayd etilishicha, ushbu fuqarolarga turli jinoyatlar, jumladan soliqlarni to‘lashdan bo‘yin tovlash, o‘ta yirik miqdordagi firibgarlik va boshqa qilmishlarni sodir etgani uchun qidiruv e’lon qilingan.

Amerika tomoni, shuningdek, Anqara Interpol Milliy markaziy byurosi, AQSH va Turkiya vakolatli organlari bilan olib borilgan muzokaralar, qo‘shma tezkor harakatlar va axborot almashinuvi natijasida qidiruvdagi shaxslarni mamlakat hududidan chiqarib yuborish to‘g‘risida qaror qabul qilingan.

Shu tariqa AQSHning Immigratsiya va bojxona politsiyasi xodimlari hamrohligida ikki nafar jinoyatchi Nyu-Yorkdan Toshkentdagi Islom Karimov nomidagi xalqaro aeroportga olib kelingan, yana ikki kishi esa Istanbuldan chiqarib yuborilgan. Keyin ular tergov harakatlarini o‘tkazish maqsadida Interpol Milliy markaziy byurosi va respublika hududiy Ichki ishlar organlari xodimlariga topshirilgan.

Eslatib o‘tamiz, avvalroq Interpol kanallari orqali qidiruvda bo‘lgan 3 nafar O‘zbekiston fuqarosi Birlashgan Arab Amirliklarida ushlanib, O‘zbekistonga olib kelingandi.