Илон Маскнинг бойлиги 800 млрд АҚШ долларидан ошди – “Forbes”

Америкалик тадбиркор Илон Маск бойлиги 800 миллиард АҚШ долларидан ошган дунёдаги биринчи инсон бўлди. Бу ҳақда “Forbes” хабар берди.

Нашрга кўра, бу ҳолат Маскка тегишли SpaceX компанияси унинг ўзига қарашли бўлган, сунъий интеллектга ихтисослашган ва Grok чат-ботини ишлаб чиққан xAI компаниясини сотиб олганидан сўнг юз берган. “Forbes” баҳосига кўра, ушбу келишув Маскнинг бойлигини 84 миллиард АҚШ долларига ошириб, рекорд даражадаги 852 миллиард АҚШ долларига етказган.

“Forbes” талқинидаги энг бой инсонлар рўйхатида иккинчи ўринда Google ҳаммуассиси Ларри Пейж жойлашган. Нашр унинг бойлигини 281 миллиард АҚШ долларга баҳолаган.

Битимгача Маск SpaceX акцияларининг 42 фоизига эгалик қилган бўлиб, уларнинг қиймати 336 миллиард АҚШ долларини ташкил этган. Шунингдек, у xAI акцияларининг 49 фоизига эга бўлган, бу улуш 122 миллиард АҚШ долларга баҳоланган. Келишувдан сўнг “Forbes” ҳисоб-китобларига кўра, Маск бирлашган компания акцияларининг 43 фоизига эгалик қилади ва уларнинг қиймати 542 миллиард АҚШ долларни ташкил этади.

“Forbes” 2025 йилнинг 20 декабрида Маскнинг бойлиги 700 миллиард АҚШ долларидан ошганини ёзган. Илон Маск нашрнинг энг бой тадбиркорлар рейтингида илк бор 2021 йил январида етакчилик қилган ва ўшанда унинг бойлиги 190 миллиард АҚШ долларига баҳоланган. 

Эслатиб ўтамиз, аввалроқ дунёнинг энг бой 20 нафар миллиардерининг жами сармояси тахминан 3,8 триллион АҚШ долларини ташкил этаётгани ҳақида хабар берилган эди.