Гурбангули Бердимуҳамедов Эрон Олий раҳнамоси билан учрашди

Бугун, 28 август куни Теҳронда амалий ташриф билан бўлган туркман халқи миллий етакчиси, Туркманистон Халқ Маслаҳати раиси Гурбангули Бердимуҳамедов Эрон Ислом Республикаси олий маънавият раҳнамоси Оятуллоҳ Али Хоманаий билан учрашди. Бу ҳақда Эрон Олий раҳбари девони хабар берди.

Туркманистон Халқ Маслаҳати раиси марҳум президент Иброҳим Раисий хотирасига ҳурмат бажо келтирар экан, унинг икки давлат ўртасидаги муносабатларни кенгайтириш йўлидаги фаолиятини юқори баҳолади ҳамда Туркманистон ва Эрон ўртасидаги чегара доимо дўстлик ва тинчлик чегараси бўлиб келгани ва шундай бўлишини ҳам қўшимча қилди.

Гурбангули Бердимуҳамедов бугунги кунда Туркманистон-Эрон ҳамкорлиги янги динамика билан ажралиб туришини таъкидлади. Унинг айтишича, Теҳронга бу галги амалий ташриф Ашхобод Теҳрон билан ҳамкорликка катта аҳамият бераётганининг ёрқин далилидир.

“Эрон ва Туркманистон ўртасидаги муносабатлар сўнгги йилларда яхши ривожланди, аммо ҳамкорликни давом эттириш учун ҳали ҳам катта салоҳият мавжуд, улардан фойдаланиш керак”, деган Али Хоманаий.

Хоманаий икки давлат ўртасидаги қўшма лойиҳалар, жумладан, “Жанубий-Шимол” автомобиль йўли лойиҳаси ва Туркманистон газ қувурини ривожлантириш лойиҳалари мавзусига ҳам тўхталиб, уларни олқишлади. Олий раҳнамо ушбу лойиҳаларнинг эронлик эксперт ва мутахассислар иштирокида амалга оширилиши икки давлат муносабатларини ҳар қачонгидан ҳам яқинлаштиришини таъкидлади.

Бугун, 28 август куни эрта тонгда Теҳронга келган Туркманистон миллий раҳбари мамлакат Президенти Масъуд Пезешкиён билан ҳам учрашиб, музокаралар олиб борди.

Туркманистон миллий етакчиси Гурбангули Бердимуҳамедов билан ўтказган қўшма матбуот анжуманида Масъуд Пезешкиён шундай деди: 

“Биз билан Туркманистон ўртасида стратегик шартномалар имзоланган ва бу алоқалар ва келишувлар бошқа соҳаларда ҳам ўртамиздаги ҳамкорликни кучайтиришга олиб келади, деб умид қиламиз. ҳамкорлик."