Гершкович бугун АҚШга қайтарилади – ОАВ 

Россияда жосусликда айбланиб, 16 йилга озодликдан маҳрум қилинган “The Wall Street Journal” журналисти Эван Гершкович бугун, 1 август куни маҳбуслар алмашинуви доирасида АҚШга қайтарилиши мумкин. Бу ҳақда “Fox News” хабар берди.

Нашрнинг Гершкович фаолият кўрсатган WSJ газетасига таяниб маълум қилишича, нашр ўз ходимининг эҳтимолий алмашинуви ҳақида маълумот олиш устида иш олиб бормоқда. Бироқ таҳририят қўшимча маълумот келтириб ўтмаган.

ТАСС нашрининг ёзишича, АҚШдаги россиялик маҳбуслар – Александр Винник, Владислав Клюшин, Вадим Конощенка ва Максим Марченконинг қаерда қамоққа олингани ҳақида маълумотлар Қўшма Штатлар федерал бюросининг оммавий электрон базасидан йўқолган. Шу боис, улар ҳақида маълумот тўплаш муаммо туғдирмоқда.

Оқ уй матбуот котиби Карин Жан-Пьер АҚШ Президенти Жо Байден давлат раҳбари сифатидаги муддати тугагунига қадар Россия билан маҳбуслар алмашинуви бўйича ишлашга содиқ қолишини маълум қилганди.

Маълумот учун, WSJ мухбири Москвадаги Лефортово суди қарори билан жосуслик иши бўйича ҳибсга олинганди. Прокуратура унга 18 йил қамоқ жазосини сўраганди. Гершкович ҳам жосуслик бўйича жиноий ишда айбини тан олишдан бош тортган. У Совет давридан бери Россияда ҳибсга олинган биринчи Ғарб журналисти бўлди.

Эслатиб ўтамиз, аввалроқ Россиянинг Свердловск вилоят суди америкалик “The Wall Street Journal” мухбири Эван Гершковични 16 йилга қаттиқ режимли колонияга ҳукм қилгани ҳақида хабар берилганди.

Зебо Туробжонова