Германияда давлат тўнтаришида гумон қилинганлар ҳибсга олинди

Кеча, 22 май куни Германияда давлат тўнтаришини режалаштирган ва “террорчи гуруҳда иштирок этиш”да гумон қилинган уч киши ҳибсга олинди. Бу ҳақда бугун, 23 май куни Германия Бош прокуратураси маълум қилди.

Айтилишича, 2022 йил 7 декабрда давлат тўнтаришига уриниш бостирилган. Махсус хизматлар 50 дан ортиқ гумонланувчидан 25 нафарини қўлга олган. Операция республика тарихидаги энг йирик операциялардан бирига бўлган. Тинтувлар Германиянинг 16 федерал штатларидан 11 тасида, 130 дан ортиқ уй ва хонадонларда ўтказилган. Фитначиларнинг ташкилоти катта ва кенг қамровли бўлиб чиққан: унинг таркибига князлик сулолаларидан бирининг меросхўри, сиёсатчилар, ҳарбийлар ва Мудофаа вазирлигининг махсус кучлари ҳам кирган.

Ҳозирда тергов натижаларига кўра, фитначиларнинг режаларига алоқадор яна уч киши аниқланган. Улардан бири Германия фуқароси Ф.Ж.Иоҳанна бўлиб, у давлат тўнтариши батафсил муҳокама қилинган ёпиқ йиғилишларида иштирок этган. Шунингдек, Ф.Ж.Иоҳанна Россия Федерацияси Бош консули билан алоқа ўрнатишга ҳаракат қилган ва у билан икки марта учрашган. 

Қолган икки янги гумонланувчи – Х.Ханс-Иоахим ва В.Штеффен – Германия Бош прокуратураси маълумотларига кўра, гуруҳга янги аъзоларни жалб қилган ва унинг фаолиятини молиялаштирган. Улардан бири 140 минг евро хайрия қилган.

Тергов фитначилар гуруҳини “Рейх фуқаролари” деб ҳам аталадиган рейхцбургерлар деб таснифлайди. Бу ҳаракат Германияда ўтган асрнинг 80 йилларида пайдо бўлган, ҳозирда унинг 23 мингга яқин тарафдорлари бор. Улар Германия ҳудуди 1937 йилда қандай бўлса, ҳозир ҳам шундай бўлиши керак деб ҳисоблайди, амалдаги ҳукуматни тан олмайди ва мамлакат урушдан кейинги даврда бўлгани каби иттифоқчилар томонидан босиб олинганини даъво қилади. “Рейхцбургерлар” тез-тез ҳарбий реконструкцияларни ташкил қилади, ёпиқ йиғилишлар ўтказади. Улар Германия ҳукумати томонидан чиқарилган ҳужжатларни ҳақиқий эмас деб ўйлайди ва ўзларининг ҳужжатларини чоп этади.

Узоқ вақт давомида махфий хизматлар ҳаракат конституциявий тузумга хавф туғдирмайди, деб ҳисобларди, чунки у парчаланган ва ҳеч қандай тузилишга эга эмас эди. 2010 йилларнинг ўрталарида эса ҳаракат радикаллаша бошланган.