Германия АҚШдан 1200 тонна олтинини қайтариб олмоқчи

Германия ўзининг АҚШда сақланаётган олтин захираларини олиб чиқиш имкониятини кўриб чиқмоқда – бу Вашингтоннинг ишончли иқтисодий ҳамкор сифатидаги мавқеига бўлган ишонч тобора сусайиб бораётгани билан боғлиқ. Бу ҳақда манбаларга таяниб, “Bild” нашри хабар берди.

Нашрнинг ёзишича, гап Нью-Йоркдаги Федерал захира банки омборида жойлашган 1200 тонна олтин ҳақида бормоқда. Ушбу захиралар Германияга тегишли бўлиб, мамлакатнинг АҚШдан кейинги энг йирик олтин захирасининг бир қисми ҳисобланади. Германиянинг умумий олтин захираси 3375 тоннани ташкил этади. АҚШда сақланаётган немис олтинининг қиймати ҳозирда 113 миллиард евродан ошади.

“Bild”нинг ёзишича, Германия кейинги ҳукуматини бошқариши кутилаётган Христиан-демократик иттифоқининг (ХДИ) юқори лавозимли вакиллари олтин захираларини АҚШдан олиб чиқиш масаласини муҳокама эта бошлаган. Жумладан, уларни Франкфурт ёки бошқа Европа омборларига кўчириш вариантлари кўриб чиқилмоқда. Бунга сабаб эса Дональд Трампнинг башорат қилиб бўлмайдиган сиёсатидан хавотирлар ортиб бораётгани бўлмоқда.

“Яқин вақтгача Германия олтин захираларининг бир қисмини АҚШда сақлаши оқилона ва прагматик стратегия сифатида кўрилган: бу молиявий инқироз шароитида Берлинда доллар ликвидлигига тезда кириш имконини берган бўларди. Бироқ Вашингтон томонидан янги тариф тўсиқлари жорий этилиши илгари қабул қилинган ҳисоб-китобларнинг ишончлилигини шубҳа остига қўйди”, деб ёзади Bild.

Нашр сўровига жавобан Бундесбанк ўз активларининг АҚШда сақланиши бўйича хавотирга асос йўқлигини билдирган.

“Биз Федерал захира банкининг (Нью-Йорк) олтин захираларимизни сақлаш учун ишончли ва ишонишга лойиқ ҳамкор эканлигига мутлақо шубҳа қилмаймиз”, дейилади банк изоҳида.

Эслатиб ўтамиз, Дональд Трамп 2 апрель куни импорт маҳсулотларига янги божлар жорий этганди. Асосий ставка бутун импорт қилинадиган маҳсулотларга нисбатан 10 фоизни ташкил этади, аммо айрим давлатлар учун бу тарифлар анча юқори белгиланган. Масалан, Хитой учун 34%, Вьетнам учун 46%, Европа Иттифоқи давлатлари учун 20%. Россия ва Беларусга нисбатан божлар жорий этилмаган.

Трамп ўз қарорини “иқтисодий мустақиллик акти” деб атаган ва бу чоралар Америка иқтисодиётининг рақобатбардошлилигини тиклашга қаратилганини таъкидлаган. Бироқ кўп ўтмай, АҚШ Президенти тарифлар бўйича музокараларга тайёрлигини билдирган. 5 апрель куни эса Оқ уй Вьетнам, Ҳиндистон ва Исроил билан аввал жорий этилган божларни юмшатишга имкон берувчи савдо келишувлари юзасидан музокараларни бошлагани маълум бўлди.