G‘azodagi vayronalardan AQSHda ishlab chiqarilgan o‘q-dorilar bo‘laklari topildi – OAV

Blokadadagi G‘azo sektorining janubidagi Xon Yunus shahrida Isroil tomonidan o‘qqa tutilishi natijasida vayron bo‘lgan uylar xarobalarida Amerikada ishlab chiqarilgan o‘q-dorilar parchalari topildi. Bu haqda "Anadolu" agentligi xabar berdi.

Agentlik suratga olgan rasmlarda AQSH Mudofaa vazirligining “DOD” (Defense Department) qisqartmasi bilan Isroil armiyasi tomonidan foydalanilgan raketalar va o‘q-dorilar parchalari ko‘rsatilgan. Isroil quruqlikdan hujum uyushtirgan G‘azo hududlarida yashovchi falastinliklar bu Amerika o‘q-dorilarining bo‘laklarini birinchi marta topishi emasligini aytdi.

"Isroil harbiylari ulardan quruqlikdan hujum qilingan hududlarda keng ko‘lamli vayronagarchiliklar keltirib chiqarish uchun foydalanadi", deydi mahalliy aholi.

Ma’lumot uchun, 4 iyun kuni Isroil Mudofaa vazirligi AQSHdan 25 ta F-35 qiruvchi samolyoti sotib olish bo‘yicha kelishuv imzolaganini ma’lum qildi. Aprel oyida AQSH Prezidenti Jo Bayden Isroilga 26 milliard dollar, jumladan, G‘azo sektoriga insonparvarlik yordami uchun 9 milliard dollar ajratish haqidagi qonun loyihasini imzolagan edi.