Ғазода болаларга қарши уруш кетмоқда – UNICEF вакили

Блокадаги Ғазо секторида содир бўлаётган воқеалар болаларга қарши урушдир. Бу ҳақда Бирлашган Миллатлар Ташкилотининг Болалар жамғармаси (UNICEF) матбуот котиби Жеймс Элдер “Anadolu” мухбири билан суҳбатда сўз очди.

Жеймс Элдер Ғазо жанубидаги Рафаҳ шаҳрида фаолият олиб борган. UNICEF вакили 2023 йил 7 октябрдаги ҳужумлардан кейин Ғазо секторига иккинчи марта ташриф буюрганини таъкидлаган.

“Бу ерда жуда чуқур умидсизлик бор. Одамлар жуда чарчаган, уларнинг кўплари очликдан ўлмоқда. Рафаҳга ҳарбий ҳужум қилиш (қуруқлик ҳужуми) ҳақидаги ақлдан озган ғоя ҳақиқатга айланиши мумкинлигидан қўрқиш ҳали ҳам бор", дейди Элдер.

Шунингдек, UNICEF матбуот котиби Ғазо сектори жанубидаги Хон Юнус шаҳридаги Носир шифохонасига ташрифи ва унинг аянчли аҳволи ҳақида гапирди.

“Асосан жароҳатланган болаларга хизмат кўрсатган жуда муҳим Носир шифохонаси энди хизмат кўрсата олмайди. Мен икки хил шифохонага ташриф буюрдим, уларнинг иккаласи ҳам гавжум”, дейди UNICEF вакили.

Элдернинг сўзларига кўра, шифохона ходимлари доимий равишда дори-дармонлар танқислигини қайд этишади ва UNICEF катта миқдордаги тиббий буюмларни етказиб беришга муваффақ бўлди.

“Бундан анча катта ҳажмдаги ёрдам, хусусан, эксклав шимолига етказилишини таъминлаш зарур. Ғазо секторидаги 36 шифохонанинг 20 дан ортиғи хизмат кўрсата олмаяпти. Ғазода болалар энг кўп азоб чекишди. UNICEF бу ерда содир бўлаётган воқеаларни “болаларга қарши уруш” деб атайди. Одатда, бу каби барча инқирозларда урушлар аҳолининг энг заиф қатламлари – болаларга зарар этказади. Йўқолган болалар тахминан 20 фоизни ташкил қилади, аммо Ғазо секторида бу кўрсаткич 40 фоизга яқин. 10 мингдан ортиқ бола ҳалок бўлди ва бу рақам ўсишда давом этмоқда. Вайроналар остида яна қанча одам қолганини билмаймиз. Бу болалар учун мутлақо ҳалокатли ҳолат. Кўп болалар очликни бошдан кечирмоқда; озиқ-овқат танқислиги вақт масаласидир", дейди Элдер.

Эслатиб ўтамиз, аввалроқ Исроил армиясининг Ғазо секторига 7 октябрдан бери давом этган зарбалари оқибатида фаластинлик 14 минг бола ва 9220 нафар аёл ҳалок бўлгани очиқланганди.