Футбол ассоциацияси қатор солиқлардан озод бўлди

Ўзбекистон футбол ассоциацияси бир қатор солиқлардан озод этилади. Бу тўғрида кеча, 18 июль куни Президент Шавкат Мирзиёев томонидан имзоланган Қонун билан Солиқ кодексининг 483-моддасига қўшимча киритилди.

Унга кўра, 2026 йил 1 январгача Ўзбекистон футбол ассоциацияси, унинг ҳудудий бўлинмалари, “Ўзбекистон Профессионал футбол лигаси” жамоат бирлашмаси, Ўзбекистон футбол ҳакамлари маркази ва профессионал футбол клублари қуйидаги солиқларни тўлашдан озод этилади:

• барча турдаги солиқлар (бундан ижтимоий солиқ мустасно);
• ўзи жалб қилган чет эл мутахассислари ва футболчиларининг даромадларидан тўланадиган жисмоний шахслардан олинадиган даромад солиғи;

Ўзбекистонга олиб кириладиган, Ўзбекистонда ўхшаши ишлаб чиқарилмайдиган спорт асбоб-ускуналари ва инвентари, трансляция қилиш учун зарур бўлган асбоб-ускуналар, инвентарь ва техника, фармакология товарлари, спорт озиқ-овқатлари, футбол (футзал) майдонлари учун сунъий ўтлар, шокпад, гранулалар, махсус елимлар ва махсус профессионал спорт кийим-бошлари, транспорт воситалари, шу жумладан, махсус транспорт воситалари учун қўшилган қиймат солиқлари шулар жумласидандир.

Қонун расмий эълон қилинган кундан эътиборан кучга киради.