“Форест”ни Европа лигасига олиб чиққан мураббий истеъфога чиқарилди

Англиянинг “Ноттингем Форест” клуби бош мураббийи Нуну Эспириту Санту жамоани 21 ой давомида бошқаргач, истеъфога чиқарилди. Португалиялик мутахассиснинг кетиши кутилмаган бўлмади, чунки у сўнгги ҳафталарда клуб эгаси Эвангелос Маринакис билан очиқчасига зиддиятда экани ҳақида гапирган эди. Бу ҳақда BBC хабар берди.

Нуну 2023 йил декабрида Стив Купер ўрнига тайинланганди. Клуб ўша пайтда турнир жадвалининг қуйи қисмида бўлса-да, португалиялик мураббий “Форест”ни Премьер-лигада ушлаб қолди ва ҳатто кейинги мавсумда тарихий ютуқларга эриштирди.

2023-2024 йилги кампания давомида жамоа “Ливерпул”, “Манчестер Юнайтед” ва “Манчестер Cити” устидан муҳим ғалабаларга эришди. Якунда “Форест” Премьер-лигада 7-ўринни эгаллаб, 30 йилдан сўнг биринчи бор Европа мусобақаларига йўлланма олди. Шунингдек, улар Англия Кубогида ярим финалгача етиб борди.

Нунунинг умумий статистикаси: 73 ўйин, 28 ғалаба, 20 дуранг ва 25 мағлубият. Бу натижалар уни “Форест” мухлислари орасида ҳурматли шахсга айлантирди.

Бироқ, майдондаги ютуқларга қарамай, клуб ичкарисида зиддиятлар кучайди. Нуну ёзги трансфер сиёсатидан норози бўлиб, клуб яхши имкониятни бой берганини очиқ танқид қилган. Маринакис эса трансфер бўйича қарорларни қатъий назорат қилган.

“Бизнинг муносабатларимиз ўзгарди, биз аввалгидек яқин эмасмиз. Клубда ҳамма бирлашиши керак, аммо ҳақиқатда бу йўқ”, дея тан олган эди у.

Шунингдек, баъзи ўйинларда Маринакиснинг тўғридан тўғри аралашуви ҳам вазиятни мураккаблаштирган. Масалан, ўтган мавсумда “Лестер”га қарши учрашувдан кейин клуб эгаси билан майдонда тортишув бўлгани хабар қилинган.

Эслатиб ўтамиз, олдинров Туркиянинг “Фенербахче” клуби португалиялик бош мураббийси Жозе Моуриньюни истеъфога чиқарди.

Жаҳонгир Болтабоев