Фон дер Ляйен Трампга кескин жавоб қайтарди

Европа Комиссияси раиси Урсула фон дер Ляйен АҚШ Президенти Дональд Трампнинг Европа автомобилларига божни ошириш таҳдидига жавоб бериб, Вашингтонни Брюссель билан тузилган савдо келишувига амал қилишга чақирди. Бу ҳақда у бугун, 5 май куни Ереванда бўлиб ўтган ЕИ – Арманистон саммитидаги матбуот анжуманида сўз очди.

“Бизда келишув бор ва унинг моҳияти фаровонлик, умумий қоидалар ва ишончдан иборат”, дейди у.

Фон дер Ляйеннинг айтишича, Европа Иттифоқи келишув доирасидаги қолган тариф мажбуриятларини амалга оширишнинг якуний босқичида. Шу билан бирга, у Европа Иттифоқи “ҳар қандай сценарийга тайёр” эканини ҳам таъкидлаган.

Айни матбуот анжуманида Европа Кенгаши раиси Антониу Кошта ЕИ етакчилари Комиссиянинг Трампнинг сўнгги савдо таҳдидига жавобини тўлиқ қўллаб-қувватлашини билдирган. Франция Президенти Эммануэль Макрон эса Ереванда Арманистон Бош вазири Никол Пашинян билан ўтказилган алоҳида матбуот анжуманида бу позицияни очиқча қўллаб-қувватлаган.

“Келишувлар имзоланган ва уларга амал қилиниши шарт. Агар улар шубҳа остига олинса, барчасини қайтадан бошлашга тўғри келади. Агар бирор давлат янги божлар билан таҳдид қилса, ЕИда жавоб қайтариш учун воситалар бор ва улардан фойдаланиш керак”, дейди Макрон.

Трампнинг навбатдаги бож таҳдидлари Вашингтон ва Брюссель ўртасидаги мураккаб савдо муносабатларида кескинликни янада оширган. Унинг баёноти Европа Иттифоқининг савдо бўйича комиссари Марош Шефчович Вашингтонга ташриф буюриб, Тернберри келишуви амалда эканини таъкидлаганидан кейин янграганди.

Маълумот ўрнида, ўтган йил июль ойида тузилган келишувга кўра, АҚШ томонидан Европа автомобилларига қўлланиладиган божлар 15 фоиз этиб белгиланган. Эвазига Брюссель саноат божларини камайтириш, АҚШдан 750 миллиард долларлик энергия харид қилиш ва Америка иқтисодиётига 600 миллиард доллар инвестиция киритишга рози бўлган эди.

Эслатиб ўтамиз, аввалроқ АҚШ Президенти Дональд Трамп Европа Иттифоқидан импорт қилинадиган енгил ва юк автомобилларига бож ставкасини 25 фоизгача оширишга қарор қилган эди.

Ойбек Рустамов