Флик “Атлетико”га қарши ўйин учун “тактик инқилоб” тайёрламоқда – ОАВ

“Барселона” бош мураббийи Ханс-Дитер Флик “Атлетико Мадрид”га қарши Испания кубоги ярим финалининг жавоб учрашуви олдидан улкан тактик инқилоб тайёрламоқда. Бу ҳақда “The Touchline” нашри хабар берди.

Манбага кўра, “Барселона” жамоаси ҳужумга кўпроқ эътибор қаратса, тўрт голлик фарқни йўққа чиқариши мумкинлигига ишонч билдирилмоқда. Жумладан, ҳужум чизиғида Роберт Левандовски, Маркус Рэшфорд, Рафинья ва Ламин Ямал бир вақтнинг ўзида майдонга тушиши мумкин.

Испания Кубоги ярим финалининг илк учрашувида каталонияликлар 0:4 ҳисобида мағлубиятга учраган эди. Флик шогирдлари биринчи бўлимнинг ўзидаёқ тўртта гол ўтказиб юборганди. Бу муваффақиятсизлик немис мутахассиси учун мураббийлик фаолиятидаги энг йирик ҳисобдаги мағлубият бўлди.

Маълумот учун, ушбу жамоалар ўртасидаги Испания кубоги ярим финалининг жавоб учрашуви жорий йилнинг 3 март куни бўлиб ўтади. Каталонияликлар мусобақанинг амалдаги чемпиони ҳисобланади.