Фитна: Си Цзиньпин энг яқин ҳарбий сафдошини ишдан ҳайдади

Кеча, 28 август куни Хитой Марказий ҳарбий кенгашидаги (МҲК) лавозимларидан генераллар Чжан Юся ва Лю Чжэньли озод этилди. Бу ҳақда “Reuters” хабар берди.

Қайд этилишича, Чжан МҲК раиси ўринбосари лавозимини эгаллаб келган У Хитой Халқ Республикаси Раиси Си Цзиньпиндан кейин ҳарбий раҳбариятдаги иккинчи одам ҳисобланган ва раиснинг энг яқин ҳарбий сафдоши бўлган. Генералларга нисбатан тергов интизом ва қонунни жиддий бузишда гумонланиб, жорий йилнинг январь ойида бошланган. 

Қайд этиш жоиз, Хитой етакчиси сўнгги бир неча йил ичида армияда коррупцияга қарши кампанияни кескин кужайтирди. Унинг доирасида собиқ мудофаа вазирлари Вэй Фэнхэ ва Ли Шанфу лавозимидан озод этилиб, терговга тортилган эди.

Кадрлар ўзгариши Хитойда эҳтимолий ҳарбий тўнтаришга уриниш ҳақидаги миш-мишлардан сўнг юз берган. 

“Жорий йилнинг 18 январь куни Чжан гўёки Пекин ғарбидаги “Инси” меҳмонхонасига Си Цзиньпинни ҳибсга олиши керак бўлган рота ҳарбий хизматчиларини юборган”, деб ёзган эди “The Spectator”. 

Хитой етакчиси Марказий муҳофаза бюросининг ҳарбий хизматчилари Чжаннинг ҳарбийларига пистирма қўйган. Ушбу тўқнашув оқибатида тўққиз нафар соқчи ва ўнлаб ҳарбий хизматчилар ҳалок бўлган.

Маълумот учун, Чжан 1979 йилги Хитой-Вьетнам урушида қатнашган. Унинг отаси, генерал Чжан Цзунсюнь ХХР Раисининг отаси Си Чжунсюньнинг сафдоши бўлган. Чжан ва Си “шаҳзодалар”га – юқори лавозимли партия арбобларининг авлодларига киради. 2012 йилда Чжан ХХОАнинг қурол-яроғ харид қилиш ва ривожлантириш учун масъул бўлган Бош қуролланиш бошқармасига раҳбарлик қилган. 2017 йилда у МҲК раиси ўринбосари бўлган, 2022 йилда эса нафақага чиқиши керак бўлса-да, ушбу лавозимга қайта сайланган.

Эслатиб ўтамиз, аввалроқ Хитойда Олий ҳарбий суд собиқ мудофаа вазирлари Вэй Фэнхэ ва Ли Шанфуларни 2 йиллик синов муддати билан шартли ўлим жазосига ҳукм қилганди.