Финляндияда 7 та гол муаллифи ўйиндан сўнг ҳибсга олинди

Жорий йилнинг 5 октябрь куни бразилиялик футболчи, Финляндия чемпионатининг бешинчи дивизионидаги “Финнкурд” клуби аъзоси Жонатан Геррейро “Эспа/Ренат” жамоасига қарши ўйин тугаганидан сўнг келишилган ўйинда иштирок этганлик ва уни ташкил қилганликда гумонланиб, Финляндия полицияси томонидан ҳибсга олинди. Бу ҳақда “Globo” нашри хабар берди.

Манбага кўра, якуний ҳуштакдан сўнг дарҳол майдондан чиқиш йўлларининг барчаси тўсиб қўйилган ва фуқаролик кийимида бўлган маҳаллий полициянинг қарийб йигирма ходими майдонга чиққан. “Финнкурд” футболчилари ҳужжатларини текшириш учун захира ўриндиғига ўтиришга мажбур қилинган, рақиб жамоа ўйинчиларига эса майдондан чиқишга рухсат берилган. 

Оқибатда Геррейро ва яна икки бразилиялик футболчи ҳибсга олинган, бироқ уларнинг телефонлари текширилгач, икки футболчи озод этилган. Геррейро “Финнкурд” жамоасида 2024 йил май ойидан бери ўйнаб келади. 2022-2023 йилларда у Финляндиянинг “Пеймари Юнайтед” клуби таркибида ҳам тўп сурган.

“Финнкурд” – “Эспа/Ренат” учрашуви 8:1 ҳисоби билан якунланган.

Эслатиб ўтамиз, аввалроқ Италия сузиш федерацияси (FIN) икки сузувчи Бенедетта Пилато ва Чиара Тарантинони 90 кунга дисквалификация қилгани ҳақида хабар берилган эди. Спортчилар Сингапурда косметик маҳсулотлар ўғирлагани учун спортдан вақтинча четлатилганди.