FIFA Паредесга кўрсатилган қизил карточкани бекор қилди

Халқаро футбол федерацияси (FIFA) Жаҳон чемпионати финалидан сўнг Аргентина терма жамоаси ярим ҳимоячиси Леандро Паредесга кўрсатилган қизил карточкани бекор қилди. Бу ҳақда BBC хабар берди.

Аввалроқ, Паредес Испанияга қарши финал учрашувидан кейин испаниялик футболчилар билан жанжаллашиб қолганди. Ўйиндан кейин Паредес аввал ҳимоячи Эрик Гарсиянинг бўйнидан ушлаган, сўнгра ярим ҳимоячи Гавини итариб юборган. Шундан кейин, Аргентина терма жамоаси футболчилари уни тинчлантиришга ҳаракат қилган.

Дастлаб FIFA Паредесга қизил карточка кўрсатилганини расман қайд этган эди. Бироқ кейинчалик ушбу карточка расмий баённомадан чиқариб ташланди. FIFA BBC’га берган изоҳида футболчига нисбатан ҳеч қандай интизомий чора қўлланилмаганини тасдиқлаган.

Шунингдек, FIFA Аргентина терма жамоаси Жаҳон чемпионати ярим финалида Англия устидан қозонилган 2:1 ҳисобидаги ғалабадан кейин “Мальвиналар аргентиналикларники” деган ёзув туширилган баннер билан нишонлагани юзасидан ҳам текширув бошлаган.

Эслатиб ўтамиз, Испания терма жамоаси 2026 йилги Жаҳон чемпионати финалида Аргентинани қўшимча вақтда 1:0 ҳисобида мағлуб этиб, ўз тарихида иккинчи марта жаҳон чемпионига айланган эди.